Xorij tajribasi o’rtoqlashildi
8-12 noyabr’ kunlari Ichki ishlar vazirligi hamda hududiy ichki ishlar boshqarmalari mas’ullaridan iborat guruh malaka oshirish maqsadida Turkiyaning Anqara shahridagi politsiya akademiyasida bo’ldi. Mazkur o’quvda Jizzax viloyati IIB huzuridagi tergov hamda jinoyat qidiruv boshqarmalari vakillari ham qatnashib, kontrabanda va uyushgan jinoyatchilikni aniqlash, fosh etish, shuningdek tergov qilishga oid zamonaviy uslub va tajribalarni o’zlashtirdilar.
O’z navbatida seminar qatnashchilari tomonidan olingan bilim va malakalarni Jizzax viloyati IIB tergov boshqarmasi hamda uning quyi tuzilmalari xodimlariga yetkazish maqsadida mashg’ulot uyushtirildi. Tadbirda Jizzax viloyati IIB huzuridagi tergov boshqarmasi boshlig’i, polkovnik Mansur Sattorov kontrabanda va uyushgan jinoyatchilikni aniqlash, fosh etish va tergov qilishda axborot-kommunikatsiya texnologiyalari hamda xorijiy tajriba va uslublarni qo’llash bo’yicha atroflicha ma’lumot berdi. O’quv mashg’uloti davomida Turkiya Ichki ishlar vazirligi strukturaviy tuzilishi to’g’risida ham so’z yuritildi.
