Jizzax viloyati ichki ishlar boshqarmasi boshlig`i, general-mayor G`ayrat Qodirov Do`stlik tumanining G`afur G`ulom MFYda sayyor qabul o`tkazdi. Madaniyat saroyida o`tgan muloqotda fuqarolar 3- sektor rahbaridan o`zlarini qiynayotgan muammolarini hal etishda amaliy yordam so`rashdi. Xususan, salomatligini tiklash, elektr ta’minotini yaxshilash uchun qo`shimcha transformator, yo`l belgilari, elektr tayanchlari o`rnatish, tadbirkorlik faoliyatini yo`lga qo`yish uchun tabiiy gaz tarmog`iga ulanish, ichki ko`chalarni shag`allashtirishga oid masalalar ko`tarildi.

Bundan tashqari moddiy yordam, ishga joylashish, yashash xonadonining kadastr hujjatini rasmiylashtirish, suyultirilgan gaz balloni bilan ta’minlash, tadbirkorlik faoliyatini yanada kengaytirish kabi masalalarga mutasaddilar ishtirokida echim izlandi. Jarayonda 20 dan ziyod ijtimoiy-iqtisodiy va maishiy masalalarini o`z vaqtida bartaraf etish bo`yicha mas’ullarga topshiriqlar berildi.

Sayyor qabul davomida ehtiyojmand fuqarolarning 5 nafariga subsidiya asosida tikuv moshinkasi, 4 nafar yoshlarga oliy ta’lim uchun shartnoma pulining ma’lum qismi to`langanligi, 2 nafariga tadbirkorlik faoliyati uchun kredit ajratilganligi haqidagi sertifikat, 1 kishiga nogironlik aravachasi berildi. Bundan tashqari 1 kishi O`zbekiston Respublikasi fuqaroligiga qabul qilinganligi hamda 16 yoshga to`lgan 3 nafar yoshlarga ИД kartalar topshirildi.

Shu kuni viloyat ichki ishlar boshqarmasi boshlig`i tuman hokimi va mas’ullar bilan birga “Флора мед” xususiy klinkasi hamda “Chinobod” MFYda yaratilgan qulayliklarni ko`zdan kechirdi.