Aziz hamkasblar, yurt osoyishtaligini asrash yo`lida fidoyilik ko`rsatayotgan qadrli do`stlar!

Sizni va oila a’zolaringizni xalqimizning qadimiy va qutlug` qadriyati, bayrami Navro`z bilan chin dildan qutlayman. Yaxshi ma’lumki, Navro`z ming yilliklar davomida elimiz tomonidan uyg`onish, yasharish, yangilanish, ezgulik timsoli sifatida tantana qilinadi. Qolaversa, bu ayyomda xalqimizning mehr-oqibatga uyg`un qadriyatlari, xususan, muhtojlarga ko`mak ko`rsatish bilan bog`liq an’analari yaqqolroq namoyon bo`ladi. Hurmatli Prezidentimiz Shavkat Miromonovich Mirziyoev ta’kidlaganidek, “Navro`z chinakam xalq bayrami, milliy o`zligimiz ko`zgusi, ma’naviy va madaniy hayotimizning ajralmas qismidir”.

Dunyoning ko`plab davlatlarida nishonlanadigan ushbu bayramning BMT tomonidan 21 mart — Xalqaro Navro`z kuni, deya belgilangani ham qutlug` ayomimizning jahondagi nufuzini oshirdi. Shu o`rinda Navro`zni Yangi O`zbekistonda kechayotgan o`zgarishlarga, mamlakatimizning siyosiy-iqtisodiy qudratini oshirish hamda xalqimizning turmush madaniyatini yuksaltirishga qaratilgan islohotlarga mengzagim keldi. Qutlug` ramazon oyida Navro`zni tantana qilayotganimiz ham bu ayyomga o`ziga xos shukuh bag`ishlamoqda.

Azizlar, barchangizni Navro`zi ayyom bilan tabriklar ekanman, el-yurt osoyishtaligi va xalqimiz hayoti farovonligini ta’minlash yo`lidagi sharafli xizmatingizda ulkan muvaffaqiyatlar tilayman.

Yurtimizga kirib kelgan Navro`z ulug` Vatanimizning har bir go`shasiga, har bir uyga, har bir oilaga yaxshilik, shodlik va to`kinlik olib kirsin. Umringiz uzoq, sog`lig`ingiz mustahkam bo`lsin, xonadoningizdan fayzu baraka arimasin!