Qalblarga quvonch ulashib
Yangi yil bayramini intiq kutmaydigan kishi bo’lmasa kerak. Boisi ushbu bayram kattalar uchun yoshlik zavqini yod etish, bolajonlarga esa ertak qahramonlari bilan uchrashish imkonini beradi. Yana sanoqli kunlardan so’ng yurtdoshlarimiz bayramni keng nishonlab, Yangi yilni qarshi olishadi. Joylarda esa bayram tadbirlari uyushtirilayotir. Xususan, viloyat musiqali drama teatrida Jizzax viloyati IIOda xizmat qilayotgan xodimlarning farzandlariga sahna asari namoyish etildi. Asosiy maqsad soha xodimlarini ijtimoiy qo’llab-quvvatlash, o’nayotgan avlodning qishki ta’til kunlarini mazmunli o’tkazishlariga ko’maklashish va bayram kayfiyati ulashishga qaratildi.
Teatr ijodiy jamoasining “Olmos botir”ning yangi yil sarguzashti” deb nomlangan sahna asari bolajonlarga zavq ulashdi. Sahnada qorbobo va qorqiz hamda ertak qahramonlarining sarguzashtlari yosh tomoshabinlar quvonchiga-quvonchi qo’shdi.
Bayram munosabati bilan viloyat IIB tomonidan xodimlarning farzandlari uchun sovg’alar ham tayyorlandi va tarqatildi. Bezatilgan archa atrofida bolajonlar she’rlar o’qishib, kuy-qo’yishlarga raqslar ijro etildi. Qisqasi, YAngi yil bayrami jajjilar uchun esda qolarli lahzalarga boy bo’ldi.
