Forish harbiy tog’-dala poligonida IIV tezkor vazifalarni bajaruvchi safarbar otryadlari terma jamoalari o’rtasida alvon beret kiyish huquqni berish bo’yicha sinovlar bo’lib o’tdi. II vazirining shu yil 19 noyabrdagi farmoyishi asosida o’tkazilgan imtihonda talabgorlarning bilimlari, jismoniy va jangovar tayyorgarliklari baholandi. Xususan, to’sinda tortilish, 100 va 3 ming metrga yugurish, terrorchilar joylashgan ko’p qavatli uylarni ishg’ol qilish va xavfni bartaraf etish, garovdagilarni qutqarish, shahar sharoitida yashiringan jinoyatchilarni qidirib topish va zararsizlantirish, qurol va vositalarni samarali qo’llash, maxsus, tibbiy tayyorgarliklari bo’yicha kompleks sinovlar olindi. SHuningdek, 3 hafta davomida Turkiya Jandarmeriyasi maxsus jamoat xavfsizligi bosh qo’mondonligi bilan hamkorlikda tashkil etilgan mashg’ulotlarda olgan bilimlari ham tekshirildi. So’nggi bosqichda talabgorlar 12 kilometrga yugurish davomida belgilangan to’siqlardan, zaharlanish hududlaridan o’tish kabi vazifalarni bajarishdi. Bundan tashqari, avtomatik qurol hamda to’ponchadan yaqin va o’rta masofalardagi nishonlarga o’q otishib, 4 raundlik qo’l janggi musobaqlarida bellashishdi.

Ta’kidlash joiz, alvon beret kiyish huquqini bershi bo’yicha sinovlar ommaviy tartibsizliklar sodir etgan shaxsni qo’lga olish, qurollangan jinoyatchilarga qarshi kurashishda xodimlarning harakatlanish mahoratini va yakka olishuvlarda jangovar malakasini oshirish hamda mustaqil qarorlar qabul qilish ko’nikmalarini rivojlantirishda muhim ahamiyatga ega. Mazkur sinovlarning birinchi bosqichida IIV TVBS batal’on va otryadlari kesimida 500 nafarga yaqin xodimlar ishtirok etishgan. Ularning 60 nafardan ziyodi Respublika bosqichda mahoratlarini namoyon etishdi.

YAkunda o’tkazilgan tantanali tadbirda sinovda qatnashgan har bir xodimning orttirgan tajriba va ko’nikmalari kelgusida mamlakatimiz tinchligi hamda osoyishtaligini ta’minlashdagi xizmat faoliyatida ahamiyatli ekanligi ta’kidlandi. O’z navbatida sinovdan muvafaqiyatli o’tgan xodimlarga alvon beret topshirildi. SHu bilan birga o’quv kursi ishtirokchilari sertifikatlar, tashkilotchilar sovg’alar bilan taqdirlandi.