Shu ma’noda mahallalar ettiliklarining faoliyati tahlil qilinib, ijtimoiy profilaktika yo`nalishida amalga oshirilgan tadbirlar sifati “xonadonbay” o`rganilmoqda. Ya’ni yaratilgan ish o`rinlari, o`zini o`zi band qilganlar faoliyati, ajratilgan imtiyozli kreditlardan foydalanish darajasi, oziq-ovqat mahsulotlari narxining sun’iy ravishda oshirilishining oldini olish borasida belgilanayotgan choralar natijadorligi tekshirilmoqda.

  Xuddi shunday, aholi bilan o`tkazilayotgan muloqotlarda respublikamiz kommunal tizimida kechayotgan islohotlar, elektr, tabiiy gaz va ichimlik suvi ta’minotini yaxshilash bo`yicha qilinayotgan ishlar, sohada kutilayotgan o`zgarishlar to`g`risida tushunchalar berilayotir. 

  Aytgancha, viloyatda jinoyatchilikni jilovlashga qaratilgan yana bir tashabbusga qo`l urildi. Xususan, Jizzax shahri va Sharof Rashidov tumanidagi 24 ta mahalla 8 ta mikrohududga ajratilib, ushbu mahallalarning har biriga qo`shimcha ravishda 1 nafar profilaktika inspektori hamda 4 nafar patrul-post xizmati xodimi jalb qilindi.

O`z navbatida mazkur xodimlar “yashil” toifadagi mahallalar hamda jinoyatchilik darajasi past bo`lgan patrullik yo`nalishlaridan olindi. Tabiyki, “qizil” va “sariq” toifadagi mahallalarga qo`shimcha kuch va vositalarning jalb etilishi kriminogen vaziyatga ijobiy ta’sir ko`rsata boshladi.

Qolaversa, boshqa huquqni muhofaza qiluvchi organlar bilan birgalikda “Xavfsiz tun” profilaktik tadbirlari o`tkazilmoqda. Natijada ichki ishlar organlari profilatika inspektorlari  hamda patrul-post xizmati xodimlari tomonidan 580 ta huquqbuzarlik aniqlanib, 2 ta jinoyat fosh qilingan. Bundan tashqari, 2 nafar qidiruvdagi shaxs ushlanib, 2 nafar bedarak yo`qolgan fuqaro topildi. 237 kishidan turli tig`li buyumlar hujjatlashtirib olingan. Yo`l-patrul xizmati xodimlari esa bir kunlik reyd davomida haydovchilar tomonidan sodir qilingan 256 ta huquqbuzarlikni aniqlashga muvaffaq bo`ldilar.

Shuningdek, qonunbuzarliklarning oldini olish maqsadida 227 ta patrullik yo`nalishlari tashkil qilindi. Qisqasi, viloyatda “Xavfsiz mahalla” tamoyili asosida jamoat xavfsizligini ta’minlash, qonunbuzarliklarning sabab va omillarini bartaraf qilish hamda jinoyatchilikka qarshi kurashishga qaratilgan tadbirlar uyushqoqlik bilan amalga oshirilayotir.