Jizzax viloyati ichki ishlar organlari tizimida faoliyat yuritayotgan barcha xotin-qizlarni bugungi bahor va nafosat bayrami bilan chin dildan qutlayman. Hurmatli hamkasblar, farzandlar tarbiyasi va oila yumushlaridan ortib, elning osoyishtaligini asrash yo`lida fidoyilik ko`rsatayotganligingiz barchamizda birdek faxr va g`urur uyg`otadi.

 Hech kimga sir emaski, yurtimizda xotin-qizlarning siyosiy, ijtimoiy, iqtisodiy faoligini kuchaytirish, gender tenglikni qaror toptirish, ayollarning huquq va manfaatlarini ta’minlash borasida amalga oshirilayotgan izchil islohotlar natijasida ayollarning jamiyatdagi o`rni va roli tobora ortmoqda. Xotin-qizlar uchun yaratilayotgan imkoniyatlardan hamkasblarimiz ham samarali foydalanayotir.

Jumladan, soha vakilalarining 5 nafari oliy o`quv yurtlarida ta’lim olayapti. 2 nafari ikkinchi mutaxassislikni egallayotir, 3 nafari ilmiy ish yoqlash maqsadida izlanish va tadqiqotlar olib bormoqda. Xuddi shunday, oramizda  Birlashgan Arab Amirliklari, Janubiy Koreya, Tunis, Germaniya, Fransiya va Yaponiyada bo`lib o`tgan paralimpiya xalqaro musobaqalari hamda Jahon va Osiyo chempionatlarida 5 ta oltin hamda 2 ta kumush medalni qo`lga kiritgan, paraosiyo o`yinlari rekordchisi, Zulfiya nomidagi Davlat mukofoti sohibasi Yoqutxon Xolbekova singari iqtidorli qizlarimiz bor.     

Yana shunisi aniqki, erkaklar bilan bir safda olib borayotgan xizmatingiz davlatimiz rahbariyati tomonidan munosib baholanmoqda. Xususan, o`tgan yili bir nafar hamkasbimiz respublikamiz Prezidentining farmoni asosida “Do`stlik” ordeni bilan taqdirlandi. Ayollarni ijtimoiy himoyalash masalasi ham doimiy e’tiborda. Chunonchi, vazirligimiz tomonidan 4 nafar xodimaga uy-joyini ta’mirlash uchun foizsiz qarz, 1 nafar xodimaga uy-joy sotib olish uchun dastlabki badal to`lovi, 3 nafar xodimaga avtokredit ajratildi.

Aminmanki, bu kabi  ezgu ishlar joriy “Atrof-muhitni asrash va “yashil” iqtisodiyot yili”da yanada kengroq ko`lamda davom ettiriladi. So`zim yakunida sizlarni 8 mart - Xalqaro xotin-qizlar kuni bilan yana bir bor tabriklayman. Barchangizga sihat-salomatlik, oilangizga fayzu baraka tilayman. Hamisha yaqinlaringiz, elimiz ardog`ida bo`lish nasib etsin! Hurmatli Prezidentimiz Shavkat Miromonovich Mirziyoev ta’biri bilan aytganda “Sizlar biz uchun hamisha go`zallik va nazokat, mehr va sadoqat, qanoat va shukronalik timsoli bo`lib kelgansiz va doimo shunday bo`lib qolasiz”.