O`zbekiston Respublikasi Prezidentining shu yil 11 aprelda “Madaniyat, savdo va xizmat ko`rsatish sohasi ob’ektlarida jamoat xavfsizligini ta’minlash tizimini takomillashtirish chora-tadbirlari to`g`risida”gi qarori qabul qilindi. Mazkur qaror ijrosini ta’minlash maqsadida Jizzax viloyati hokimi rahbarligida idoralar va tashkilotlar mas’ullaridan iborat hududiy komissiyasi tuzildi. Ushbu komissiya a’zolari yig`ilishida madaniyat, savdo va xizmat ko`rsatish ob’ektlarida jamoat xavfsizligi ta’minlash tizimini yanada takomillashtirish, huquq-tartibot organlari va xo`jalik yurituvchi sub’ektlar o`rtasida o`zaro samarali hamkorlikni tashkil etishda mahalliy ijro etuvchi organlar rolini oshirish bo`yicha qilinishi lozim bo`lgan ishlar xususida so`z bordi.

Qayd etilishicha, viloyat komissiyasi tomonidan viloyat hududidagi qo`riqlanishi shart bo`lgan ob’ektlar ro`yxati tasdiqlangan bo`lib, ushbu ob’ektlarni qo`riqlash qurolli bo`linmalar tomonidan amalga oshiriladi. Shu ma’noda xo`jalik yurituvchi sub’ektlar bilan Ichki ishlar yoki Milliy gvardiya bo`linmalari o`rtasida ob’ektlarni qo`riqlash bo`yicha shartnomalar tuzish, o`rnatilgan videokuzatuv tizimlarini ichki ishlar organlari va Milliy gvardiyaning hududiy bo`linmalari situasion markazlariga integrasiya qilish, ro`yxatga kiritilgan ob’ektlarning “Xavfsizlik pasporti” tayyorlanishi masalalari muhokama qilindi.

Yig`ilishdan so`ng viloyat IIB JXX JTSB, milliy gvardiya viloyat boshqarmasi, viloyat FVB ma’sullari Jizzax shahridagi aholi gavjum bo`lgan savdo markazlarida bo`lishib, hududda inson xavfsizligini ta’minlash yuzasidan olib borilayotgan ishlarni o`rganishdi.