8 mart - Xalqaro xotin-qizlar kuni munosabati bilan Jizzax viloyati IIB tomonidan boshqarma sohaviy xizmatlari va  jazoni ijro etish muassasalari xodimalari, IIV Jizzax akademik liseyi, viloyat IIB tibbiyot bo`limi, MTT hamda sohaning boshqa bo`g`inlarida faoliyat yuritayotgan erkin yollangan xotin-qizlar, faxriylar, davlat va jamoat tashkilotlari vakillari ishtirokida bayram uyushtirildi. Tadbir avvalida viloyat IIB boshlig`i, general-mayor G`ayrat Qodirov respublika Ichki ishlar vazirining bayram tabrigini o`qib eshittirdi.

Shuningdek, xotin-qizlarning yurtimiz taraqqiyoti, xususan ichki ishlar organlari xodimlari safida tinchlik va osoyishtalikni ta’minlash ishiga qo`shayotgan hissasi, ularning jamiyatdagi o`rni va rolini kuchaytirishga qaratilgan islohotlarga to`xtalib, ayollarni bayram bilan muborakbod etdi.

Bayram tadbirida xizmatdoshlariga har jabhada ibrat bo`lib, faoliyati davomida yuqori natijalarga erishib kelayotgan xodimalarning bir nafariga Ichki ishlar vazirining buyrug`i asosida “A’lo xizmatlari uchun”, 2 nafariga uchinchi darajali “Ichki ishlar organlarida benuqson xizmatlari uchun” ko`krak nishonlari, faxriy yorliq, esdalik qo`l soati, navbatdagi maxsus unvonlar topshirildi.

Xuddi shunday, viloyat ichki ishlar boshqarmasi tomonidan faol xotin-qizlar hamda xizmat burchini bajarish chog`ida vafot etgan xodimlarning turmush o`rtoqlari, shu bilan birga namunali xizmat qilayotgan xodimlarning onalariga esdalik sovg`alari bilan taqdirlanishdi. Yana bir guruh ayollar moddiy rag`batlantirildi.

Tadbir davomida viloyatimiz hamda poytaxtlik taniqli san’atkorlarning konsert dasturi namoyish etildi. Dasturxon atrofidagi dildan suhbat o`yin kulguga ulandi.