1 noyabrdan 1 dekabr kuniga qadar yurtimizda “Xavfsiz temir yo`l oyligi” o`tkazilmoqda. Shu maqsadda Jizzax temir yo`l vokzalida IIV transport va turizm ob’ektlarida xavfsizlikni ta’minlash departamenti Jizzax viloyati transportda xafsizlikni ta’minlash boshqarmasi tomonidan tadbir uyushtirildi. Soha xodimlari, harbiylashtirilgan o`qchilik va o`t o`chirish komandasi, keng jamoatchilik, temir yo`l tizimidagi barcha korxona va tashkilotlar hamda boshqa manfaatdor idoralar, huquqni muhofaza qilish organlarining hududiy bo`linmalari xodimlari ishtirok etishgan tadbirda “Xavfsiz temir yo`l oyligi” doirasida amalga oshiriladigan ishlar xususida so`z bordi.

Qayd etilishicha, mazkur profilaktik tadbirda asosiy e’tibor harakat tarkiblari va ishtirokchilari bilan bog`liq baxtsiz hodisalar sodir etilishning barvaqt oldini olish, temir yo`l transportida yo`lovchi va fuqarolarda jinoyat va huquqbuzarliklarga qarshi immunitetni oshirish, ularda temir yo`l transportida xavfsizlik qoidalariga qat’iy rioya qilish hissini kuchaytirishga qaratilishi tushuntirildi.

Ta’kidlash joiz, “Xavfsiz temir yo`l oyligi”da yo`lovchilar, yo`lovchi va yuk poezdlari harakat xavfsizligiga salbiy ta’sir ko`rsatishi mumkin bo`lgan omillar o`rganilib, ular bartaraf etiladi. Bundan tashqari xavfsizlik yuzasidan qo`shimcha jihozlar talab etiladigan temir yo`l yo`nalishlariga ta’qiqlovchi va ogohlantiruvchi belgilar o`rnatilishi ko`zda tutilgan.

Shuningdek, temir yo`l o`tgan aholi puntlarida fuqarolar, keng jamoatchilik hamda yoshlar ishtirokida uchrashuv hamda davra suhbatlari tashkil qilinadi. Bu orqali aholining huquqiy bilimi oshirilib, favqulodda holatlarga yo`l qo`ymaslik, temir yo`l bilan bog`liq jinoyat va huquqbuzarliklarning oldini olishga erishiladi.