Ichki ishlar vaziri o`rinbosari dastlab Do`stlik tumanidagi 1- sonli o`rta umumta’lim maktabida tuman IIB va hokimlik hamkorligida tuzilgan “Lider vatanparvarlar” guruhi hamda “Vatanparvarlik va huquq” to`garaklari faoliyati bilan tanishdi.

Mazkur jarayonda general-mayor Davron Nazarmuhammedov yoshlarni qiziqtirgan savollarga javob qaytardi. So`ng maktabda o`quvchilarning bilim olishlari, sport bilan shug`ullanishlari hamda kasb-hunar egallashlari uchun yaratilgan sharoitlarni ko`zdan kechirdi. Binobarin, yo`l harakati xavfsizligi maydonchasi, issiqxona hamda kasb-hunar o`rgatishga ixtisoslashgan minimarkazda bo`ldi. Shuningdek, “Chinobod” mahalla fuqarolar yig`ini ettiligi faoliyatini o`rganib, faollar uchun yaratilgan sharoitlar bilan tanishdi.  

Shu kuni vazir o`rinbosari Jizzax viloyati mudofaa ishlari boshqarmasiga ham bordi. Bu erda tibbiy ko`rik hamda chaqiriluvchilarning  salohiyatlarini sinovdan o`tkazish uchun yaratilgan sharoitlarni ko`zdan kechirib, harbiy xizmatga jo`nab ketayotgan yoshlar bilan suhbat o`tkazdi.

Davron Nazarmuhammedov Jizzax shahridagi “Bog`ishmamol” mahalla fuqarolar yig`ini faollari bilan ham uchrashdi. Mazkur jarayonda ettilikning huquqbuzarlik va jinoyatlarning oldini olish hamda mavjud ijtimoiy muammolarni hal qilish borasidagi faoliyatiga e’tibor qaratildi. 

Xuddi shunday, vazir o`rinbosari Jizzax viloyati bo`yicha milliy gvardiya boshqarmasi faoliyati bilan tanishdi. Bu erda soha vakillarining jamoat xavfsizligini ta’minlashga qaratilgan faoliyati o`rganilib, harbiy xizmatchilarning intellektual, jismoniy va jangovar salohiyatini oshirish uchun yaratilgan sharoitlar ko`zdan kechirildi.  

Shu kuni Jizzax viloyati IIB JXX YHXB ro`yxatdan o`tkazish va imtihon olish bo`limida xodimlar va fuqarolarga yaratilgan sharoitlar bilan tanishilib, ish jarayonining kechishiga oid vaziyat tahlil qilindi. Bundan tashqari Davron Nazarmuhammedov viloyat favqulodda vaziyatlar boshqarmasida bo`ldi. Bu erda kechgan muloqotda qutqaruvchilar va g`avvoslar foydalanuvidagi texnika va vositalar, shaxsiy tarkib tayyorgarligini oshirish hamda soha vakillarining imkoniyatlari haqida atroflicha ma’lumot berildi. 

Jizzax viloyati IIB axborot xizmati.