Prezidentimiz rаisligidа shu yilning 11 oktyabr kuni o`tkazilgan videoselektr yig`ilishida “Yashil makon” umummilliy loyihasining kuzgi mavsumini tashkil etish doirasidagi ishlar ko`rib chiqilib, ustuvоr vаzifаlаr va chora-tadbirlar aniq belgilab berilgan edi. Shu asosida Jizzax viloyatida ham ko`lamli ishlar amalga oshirilmoqda. Bu ishda Jizzax viloyati ichki ishlar organlari xodimlari ham faol ishtirok etishayapti.

Zafarobod tumanining Samarqand mahallasida “Obod xonadon”, “Obod ko`cha” va “Obod mahalla” dasturi doirasida bunyodkorlik ishlari olib borilmoqda. O`tgan shanba kuni mahallada hashar uyushtirildi. Mahallaning bo`sh turgan 2 gektar erini boqqa aylantirish maqsad qilingan xayrli tadbirda tumandagi korxona va tashkilotlar, mahalla ahli hamda keng jamoatchilik qatori viloyat IIO xodimlari ham jonbozlik ko`rsatishdi.

Ta’kidlash joiz, ko`chatlar hududning iqlim sharoitidan kelib chiqib bog`lar hosil qilish va ko`kalamzorlashtirishni nazarda tutgan holda tanlab olindi. Hashar davomida viloyat 3- sektor rahbari endilikda o`tqazilgan ko`chatlarni agrotexnik talablar asosida parvarish qilish, mineral va organik o`g`itlar bilan oziqlantirilib, zararkunandalardan himoya qilib borish zarurligini uqtirdi. Shu kungi hasharda jami 2 mingta mevali va manzarali daraxt ko`chatlari o`tqazildi.

Jarayonda Jizzax viloyati IIB boshlig`i, general-mayor G`ayrat Qodirov hududda dastur doirasida olib borilayotgan ishlar, mahalla fuqarolar yig`ini idorasi qurilishining borishi bilan ham tanishdi. Mas’ullar ishtirokida amalga oshirilayotgan ishlar muhokama qilinib, obodlik ishlarini yanada kengaytirish bo`yicha vazifalar belgilandi.

Daraqiqat, yurtimizda ko`chat ekib bog` yaratish tashabbusi keng ko`loch yoygan. Qaysiki hududda bo`lmang, ayni yo`nalishda qizg`in ish olib borilayotganiga guvoh bo`lasiz. Daraxtzorlarni ko`paytirishga qaratilgan umummilliy loyiha doirasida viloyat ichki ishlar boshqarmasi tomonidan yana bir ezgu ishga qo`l urildi. Xususan, Sharof Rashidov tumanining Oqtosh ota MFY hududida barpo etilayotgan “Yangi O`zbekiston” massivi yonidagi adirlikda ichki ishlar bog`i barpo etilayapti. Ko`chat ekish ishlarida viloyat IIB sohaviy xizmatlari xodimlari tomonidan iqlim sharoitiga mos bo`lgan 600 ta mevali va manzarali ko`chatlar o`tqazildi.

Qayd etish joiz, mazkur mazkur hudud lalmi joy ekanligi hisobga olinib, daraxt ko`chatlarini sug`orish masalasiga alohida e’tibor qaratilgan. Ayni maqsadda zarur choralar belgilanib, uni amalga oshirish, shu bilan birga ekilayotgan ko`chatlarni parvarishlash, mineral va tabiiy o`g`itlar bilan ozuqalash ham ko`zda tutilgan.

Bugungi kunda ekologik muammolar ko`plab mamlakatlarning global mavzusiga aylanib ulgurgan. Bu esa, butunjahon hamjamiyatini ona tabiatni asrashga chaqirmoqda. Jizzax viloyati ichki ishlar organlari xodimlari ham hayotimiz, salomatligimiz uchun muhim bo`lgan daraxt ekish ishlarida faollik ko`rsatish orqali atrof-muhitni sog`lomlashtirish, xilma-xil manzaralar barpo etishda o`z hissalarini qo`shishmoqda.