Jizzax viloyati ichki ishlar organlari xodimlarining osoyishtalikni ta’minlashga qaratilgan faoliyati, xususan, davlatimiz rahbarining joriy yil 3 yanvardagi “2025 yilda respublika mahallalarida xavfsiz muhitni yaratish va huquqbuzarliklarning barvaqt oldini olish tizimi samaradorligini yanada oshirish bo`yicha chora-tadbirlar to`g`risida”gi qarorining ijrosiga oid matbuot anjumani bo`lib o`tdi. Ochiq muloqotda jurnalistlarning savollariga Jizzax viloyati ichki ishlar boshqarmasi boshlig`i, general-mayor G`ayrat Qodirov javob qaytardi.

Ommaviy axborot vositalari, huquqni muhofaza qiluvchi organlar, viloyat axborot va ommaviy kommunikasiyalar agentligi, tashkilot va korxonalarning axborot xizmatlari vakillari hamda blogerlar ishtirokida uyushtirilgan matbuot anjumani avvalida Jizzax viloyati IIB boshlig`i, general-mayor G`ayrat Qodirov fuqarobay va xonadonbay o`rganish orqali aholi muammolariga echim topish, sodir etilgan jinoyatlarni omma ishtirokida muhokama qilish, mahalla ettiligining qonunbuzarliklar profilaktikasi borasidagi mas’uliyatini kuchaytirish borasida belgilanayotgan chora-tadbirlar xususida so`z yuritdi.

Shuningdek, notiq davlatimiz rahbarining joriy yil 3 yanvardagi “2025 yilda respublika mahallalarida xavfsiz muhitni yaratish va huquqbuzarliklarning barvaqt oldini olish tizimi samaradorligini yanada oshirish bo`yicha chora-tadbirlar to`g`risida”gi qarori asosida qilinayotgan va rejadagi ishlar haqida ham ma’lumotlar berdi. Chunonchi, viloyatdagi 309 ta mahalladagi kriminogen vaziyat tahlil qilinib, jinoyatlarning oldini olish bo`yicha yo`l xaritasi tayyorlangani va mazkur xaritada belgilangan vazifalarning ijro etilishini nazorat qilish maqsadida idoralararo muvofiqlashtirish ishchi guruhlari tashkil qilinganligini bayon qildi.

O`z navbatida, kriminogen vaziyati og`ir bo`lgan 63 ta mahallaning har biriga hokimlik va huquqni muhofaza qiluvchi organlardan mas’ullar biriktirilgan. Xuddi shunday, viloyatda 312 ta namunaviy xavfsiz ko`cha va yo`laklarni tashkil qilishga qaratilgan tadbirlar izchillik bilan amalga oshirilayotgani bildirildi.

Bu ko`cha va yo`laklarda fuqarolarning xavfsiz harakatlanishi uchun hamma sharoitlar yaratilishi, binobarin, obodonlashtirilishi, yoritilishi, kuzatuv kameralari nazoratiga olinishi ma’lum qilindi. Umuman olganda, yil yakuniga qadar viloyatdagi mahallalarga 6 ming 440 ta kuzatuv kameralari o`rnatish rejalashtirilgan. Mazkur qurilmalarning 1180 tasi aylanuvchi, 1 ming 360 tasi yuz va avtoraqamlarni tanish xususiyatiga ega bo`ladi.

Qolaversa, muqaddam sudlanganlar, ma’muriy nazorat ostidagilar, jazoni ochiqda o`tayotgan shaxslarning bandligini ta’minlash, ularga kasb-hunar o`rgatish, ijtimoiy-maishiy muammolarini hal qilish choralari kuchaytiriladi.

Tadbirda viloyat prokurori, adliya katta maslahatchisi Baxtiyor Ibrohimov ham so`zga chiqdi. Anjuman davomida jurnalist va blogerlar o`zlarini qiziqtirgan barcha savollarga javoblar olishdi. Tadbir yakunida ichki ishlar organlari bilan faol hamkorlik qilayotgan bir guruh jurnalistlarga 8 mart – Xalqaro xotin-qizlar kuni munosabati bilan sovg`alar topshirildi.

Jizzax viloyati IIB axborot xizmati.