Kinologlar mahorati oshirilmoqda
Ayni kunlarda Jizzax viloyati IIB JXX JTSB kinologiya bo`linmasi
xodimlari ishtirokida umumiy va maxsus kurs yo`nalishlarida o`quv
mashg`ulotlari o`tkazilmoqda. Mazkur jarayonda soha vakillarining kinologiya
xizmati tarixi, kinologning kasb etikasi, itlarni xizmatga tayyorlashning
fiziologik asoslari, jonivorlarni buyruqqa bo`ysundirish va salomatligini
asrash kabi 23 ta mavzuda nazariy bilimlari oshiriladi.
Amaliy mashg`ulotlarda esa to`siqlardan o`tish, bino va inshootlarni
tekshirish, jinoyat turiga ko`ra voqea joyida iz qidirish, qurolli qarshilik
ko`rsatayotgan shaxsni qo`lga olish, qurol, portlovchi hamda giyohvand
moddalarni topish kabi mashqlar bajarilyapti. Bunda xizmat itlarining jism,
buyum, odamlarni hidga asosan ajrata olishi, buyruqqa qat’iy bo`ysunishlariga
e’tibor qaratilmoqda.
Xuddi shunday, xodimlarning jangovar qurollarni to`liqsiz qismlarga
ajratish va yarog`lardan foydalanishga oid bilim va ko`nikmalari
mustahkamlanayotir. Bir oy davom etadigan mashg`ulot yakunida o`quv
qatnashchilarining iz qidiruv, portlovchi hamda giyohvand moddalarni topishga
oid salohiyatlari sinovdan o`tkaziladi.
