Кинологлар маҳорати оширилмоқда
Айни кунларда Жиззах вилояти ИИБ ЖХХ ЖТСБ кинология бўлинмаси ходимлари
иштирокида умумий ва махсус курс йўналишларида ўқув машғулотлари ўтказилмоқда.
Мазкур жараёнда соҳа вакилларининг кинология хизмати тарихи, кинологнинг касб
этикаси, итларни хизматга тайёрлашнинг физиологик асослари, жониворларни
буйруққа бўйсундириш ва саломатлигини асраш каби 23 та мавзуда назарий
билимлари оширилади.
Амалий машғулотларда эса тўсиқлардан ўтиш, бино ва иншоотларни
текшириш, жиноят турига кўра воқеа жойида из қидириш, қуролли қаршилик
кўрсатаётган шахсни қўлга олиш, қурол, портловчи ҳамда гиёҳванд моддаларни
топиш каби машқлар бажариляпти. Бунда хизмат итларининг жисм, буюм, одамларни
ҳидга асосан ажрата олиши, буйруққа қатъий бўйсунишларига эътибор қаратилмоқда.
Худди шундай, ходимларнинг жанговар қуролларни тўлиқсиз қисмларга
ажратиш ва яроғлардан фойдаланишга оид билим ва кўникмалари мустаҳкамланаётир.
Бир ой давом этадиган машғулот якунида ўқув қатнашчиларининг из қидирув,
портловчи ҳамда гиёҳванд моддаларни топишга оид салоҳиятлари синовдан
ўтказилади.
