Jizzax viloyati ichki ishlar boshqarmasi tomonidan muhokama yig`ilishi o`tkazildi. Sektorlar rahbarlari, mutasaddi idora va tashkilotlar, mahalla faollari ishtirok etgan yig`ilishda kriminogen vaziyatni barqarorlashtirish, jinoyatchilikka qarshi kurashish va huquqbuzarliklar profilaktikasini ta’minlash borasida amalga oshirilayotgan ishlar tahlil qilindi. Shuningdek, firibgarlik bilan bog`liq qonunbuzilishlar, ularning sodir etilishiga sabab bo`layotgan omillar tilga olindi.

Ta’kidlanishicha, Paxtakor tumanida yashovchi viloyat davlat moliyaviy nazorat boshqarmasi mas’uli 2023 yilning sentyabr oyida Jizzax shahar tibbiyot birlashmasida byudjet mablag`laridan maqsadli foydalanish yuzasidan taftish o`tkazgan. Taftish xulosasida aniqlangan qonunbuzilish holatlarini kamaytirib ko`rsatish evaziga tibbiyot birlashmasi hisobchisidan o`zining hamkasbi orqali 5 ming AQSh dollari olganligi aniqlangan.

Viloyat huquq-tartibot organlari xodimlarining hamkorlikdagi tezkor tadbirida firibgarlik bilan bog`liq yana bir qonunbuzarlik fosh qilindi. Xususan, Jizzax shahrining Obod mahallasida yashovchi davlat unitar korxonasi hisobchisi Sharof Rashidov tumani Ziyokor mahallasida yashovchi fuqarodan 15 ming AQSh dollari talab qilib, ushbu pullardan 5 ming AQSh dollarini olgan vaqtida ashyoviy dalillar bilan ushlangan. Ma’lum bo`lishicha, pul talab qilgan shaxs jabrlanuvchining mas’uliyati cheklangan jamiyati rahbari bo`lgan qarindoshiga nisbatan qo`zg`atilgan jinoyat ishi bo`yicha O`zbekiston Respublikasi Oliy sudi va Sirdaryo viloyat sudida yuqori lavozimda ishlovchi tanishlari orqali engil jazo tayinlatishga ishontirgan.

Yig`ilishda bundan tashqari kiberjinoyatchilik va uning turlari, bank plastik kartalari bilan bog`liq firibgarliklar, kuchli ta’sir qiluvchi dori vositalari bilan bog`liq qonunbuzarliklar haqida ham ma’lumotlar berildi. Shu bilan birga, jinoyatchilikning oldini olish va fuqarolar huquq va erkinliklarini ta’minlash, osoyishtaligini saqlashda huquqni muhofaza qiluvchi organlar bilan bir qatorda jamoat tashkilotlari va har bir kishi mas’ul ekanligi tushuntirildi.