4 Sentyabr 2023 yil 805

Litseyda yangi o’quv yili boshlandi

Bugundan yurtimizdagi barcha ta’lim muassasalarida yangi o’quv yili boshlandi. O’zbekiston Respublikasi Ichki ishlar vazirligi Jizzax akademik litseyida ham shu munosabat bilan tantanali tadbir uyushtirildi. Tadbirda Jizzax viloyati IIB boshlig’i o’rinbosari, podpolkovnik Hamidullo Abdullayev barchani istiqlolning 32 yilligi hamda bilimlar kuni bilan muborakbod etdi. SHuningdek, ichki ishlar organlari faoliyati samaradorligini oshirish, sohaga yetuk malakali kadrlar tayyorlashda Ichki ishlar vazirligi Jizzax akademik litseyi tayanch bilim dargohlardan ekanligini ta’kidladi. Ichki ishlar organlarida xizmat qilishni maqsad qilgan yoshlarga bilim berish, ularni kasbiy tayyorlash, ma’naviy-axloqiy fazilatlarini mustahkamlashda o’z o’rniga ega bo’lgan litsey o’quvchilari va pedagogik jamoaning yutuqlari e’tirof etildi.

Shundan so’ng, O’zbekiston Respublikasining davlat madhiyasi yangradi va o’quvchilar minbar oldidan saf tortib o’tdilar.

Ilk darslar “YAngi hayot uchun, yangi O’zbekiston uchun” mavzusida o’tildi. O’qituvchilar tomonidan istiqlol yillarida qo’lga kiritilgan yutuqlar, olib borilayotgan islohotlar, xalq xo’jaligi tarmoqlarida amalga oshirilayotgan ishlar aytildi.

Jizzax viloyati IIB axborot xizmati

Text to speech