O`zbekiston Respublikasi Ichki ishlar vazirligi, Bosh prokuratura, Kambag`allikni qisqartirish va bandlik vazirligi, Favqulodda vaziyatlar vazirligi, Sog`liqni saqlash vazirligi, Soliq qo`mitasi, Milliy gvardiya, Yoshlar ishlari agentligi, Oila va xotin-qizlar qo`mitasi, O`zbekiston mahallalari uyushmasining shu yil 29 iyul kuni “Xavfsiz hudud va mulkiy jinoyatlar profilaktikasi oyligi” maxsus profilaktik tadbirini o`tkazish chora-tadbirlari bo`yicha yo`riqnomani tasdiqlash to`g`risida”gi qo`shma qarori qabul qilindi. Shu asosida respublika miqyosida keng qamrovli “Xavfsiz hudud va mulkiy jinoyatlar profilaktikasi oyligi” o`tmoqda.

Maxsus profilaktik tadbir doirasida Jizzax viloyatida ham qator ishlar amalga oshirilmoqda. Xususan, Jizzax shahrida xizmatga jalb etilgan huquq-tartibot, davlat va jamoat tashkilotlari vakillari ishtirokida yig`ilish tashkil etildi. Yo`riqnomada aholi osoyishtaligini saqlash, kriminogen vaziyat barqarorligini ta’minlashga qaratilgan aniq vazifalar belgilandi.

Ta’kidlash joiz, jamoat tartibini saqlash, fuqarolar xavfsizligini ta’minlash, huquqbuzarliklar va jinoyatchilikning oldini olish ishlariga ichki ishlar boshqarmasining barcha kuch vositalari jalb etilgan. Soha xodimlari hamkor tashkilotlar vakillari bilan birga mulkiy turdagi jinoyatlarning oldini olish, aholini ogohlikka chorlash, ularning bu boradagi huquqiy onggi va madaniyatini yuksaltirishga qaratilgan targ`ibotlar qilinmoqda. Shu ma’noda umumiy ovqatlanish shahobchalari, choyxona, restoran va kafelar, savdo va ko`ngilochar majmualarda tadbirkorlar va fuqarolarga o`g`irlik, firibgarlik kabi qonunbuzarliklardan ogoh bo`lish kerakligi targ`ib qilindi.

Shuningdek, shahar IIB JXX probasiya guruhi nazoratida jazo o`tayotgan mahkumlar hamda ma’muriy nazorat ostidagi shaxslar bilan profilaktik suhbatlar qilindi. Tadbir davomida ovchilarning ov qurollarini qay tartibda saqlayotgani ham ko`zdan kechirildi. Bundan tashqari qarovsiz qoldirilgan turli buyumlar egalariga topshirilib, ularga ogoh bo`lish va buyumlarni qarovsiz qoldirmaslik lozimligi etkazildi.

Tungi vaqtda bemaqsad yurgan shaxslar esa IIBlarga olib kelinib, ular bilan profilaktik suhbat olib borildi. Nizoli fuqarolar bilan esa muloqot chog`ida, ularning ijtimoiy-maishiy muammolarini hal etishga amaliy ko`mak berilayapti.