Jizzax viloyati ichki ishlar boshqarmasi huzuridagi tergov boshqarmasi boshlig`i o`rinbosari, podpolkovnik G`ofur Bozorov rahbarligidagi ishchi guruh tomonidan Yangiobod tumanining qizil toifadagi mahallalarida profilaktik tadbirlar amalga oshirildi. Asosiy e’tibor jinoyatchilikni jilovlash, ularning sodir etilishiga sabab bo`ladigan omillarni bartaraf etish, aholining huquqiy bilimini oshirishga qaratildi. Shu ma’noda tuman markazidagi joylashgan “Mohir bolajon” MTT oldiga yo`l belgilari, Yangiobod shaharchasi markazidagi serqatnov ko`chaga zamonaviy kuzatuv kameralari o`rnatildi. Shu qatorda savdo va xizmat ko`rsatuvchi tadbirkorlar, korxona va tashkilotlar rahbarlariga binolarni videokuzatuv moslamalari bilan jihozlash, eshik va derazalarga temir panjaralar qo`yish turli ko`rinishdagi jinoyatlarning oldini olishda muhim ekanligi targ`ib qilindi.

Bundan tashqari qizil toifadagi fuqarlar yig`inlarida ettilik bilan hududda jinoyatchilikka chek qo`yish, huquqbuzarliklar profilaktikasini ta’minlash, voyaga etmaganlar, ishsiz aholi bandligini ta’minlash, nazorat ostidagi shaxslar, nizolashgan oilalar bilan olib borilayotgan ishlar tahlil qilindi. Shuningdek, mavjud muammolarni bartaraf etish nuqtai nazaridan zarur chora-tadbirlar belgilandi.

Profilaktik tadbir davomida aholi xonadonlarida targ`ibotlar ham qilindi. Jarayonda yurtimizda aholi turmush sharoitini yanada yaxshilash yuzasidan olib borilayotgan ishlar xususida so`z borib, ogoh va hushyor bo`lish lozimligi uqtirildi.

Tadbir davomida hudud yoshlarining erishayotgan yutuqlarini targ`ib etish, yosh avlodni vatanparvarlik ruhida tarbiyalash, ularni kasb-hunarga yo`naltirish bo`yicha ko`rilayotgan ishlarga ham nazar tashlandi. Shuningdek, hashar uyushtirilib, obodonlashtirish va ko`klamzorlashtirish ishlari olib borildi.