Hurmatli ichki ishlar organlari faxriylari, ustoz va murabbiylar!

Barchangizni mamlakatimizda keng nishonlanayotgan O`qituvchi va murabbiylar kuni bilan samimiy tabriklayman. Qadrli muallimlar, sizning jamiyat taraqqiyoti, xalqimizning eng ezgu qadriyatlari bardavomligini ta’minlashdagi o`rningiz beqiyosdir.

Zero qalblarni ziyo chirog`i yanglig` yoritasiz, dillarga ilm va yaxshilik urug`ini ekasiz. Shu ma’noda hamisha xalqimizning chuqur hurmatiga loyiqsiz. Mazkur ehtirom davlatimiz siyosatida ham o`zining yorqin ifodasini topmoqda.

Chunonchi, Prezidentimiz Shavkat Miromonovich Mirziyoev ta’kidlaganidek: “Ta’lim tizimini rivojlantirish davlatning bosh vazifalari qatoriga kiritilgani bejiz emas. Chunki jamiyat hayotida o`qituvchining o`rni va ta’siri oshsa – maktabning obro`si oshadi, ilm-fan, ta’lim va tarbiya sohasining qadri ko`tariladi. Muallimning obro`-e’tibori esa bu millatning, butun xalqning obro`-e’tiboridir”.

Darhaqiqat, bugun yurtimimizda “O`zbekistonda eng obro`li inson muallim bo`lishi kerak” degan g`oya asosida salmoqli ishlar amalga oshirilayotganligiga barchamiz guvohmiz. Ushbu o`zgarishlar Ichki ishlar vazirligining viloyatimizdagi ta’lim muassasalari hayotida ham yaqqol sezilmoqda. Jumladan, Ichki ishlar vazirligi Jizzax akademik liseyida o`qituvchi va o`quvchilar uchun eng zamonaviy sharoitlar yaratildi.

Shuningdek, viloyat ichki ishlar boshqarmasi qoshidagi 40- sonli maktabgacha ta’lim tashkiloti kapital ta’mirdan chiqarilib, davr talablari asosida jihozlandi. Qolaversa, Zomin tumanida joylashgan, boshqarmamizga qarashli havas qilgudek imkoniyatlarga ega sog`lomlashtirish oromgohi bolalarning yozgi ta’tilni mazmunli o`tkazishlarida omil bo`lmoqda.

Qadrli ustozlar!

Fursatdan foydalanib, barchangizni O`qituvchi va murabbiylar kuni bilan yana bir bor chin dildan qutlayman. Ichki ishlar organlari tizimini chuqur bilimga ega etuk kadrlar bilan ta’minlash, vatanparvar, mard va jasur avlodni shakllantirishdek mas’uliyatli xizmatingizda muvaffaqiyatlar tilayman. Umringiz uzoq, xonadoningiz fayzli bo`lsin, har bir kuningizni yaxshiliklar bezasin!

Hamisha sog`-omon bo`ling, muhtaram ustozlar!