Baxmal tumani ichki ishlar bo`limida tungi xizmatga jalb etilgan ichki ishlar organlari hamda milliy gvardiya xizmatchilari ishtirokida yo`riqnoma tadbiri o`tkazildi. Tadbirda viloyat ichki ishlar boshqarmasi boshlig`i, general-mayor G`ayrat Qodirov tumanda jinoyatchilikka qarshi kurashish, huquqbuzarliklarning oldini olish, xizmat intizomi va qonuniylikni ta’minlash borasidagi ishlarga e’tibor qaratdi. Shu ma’noda joriy yilning o`tgan davrida hududda sodir etilgan qonunbuzarliklar tahlil qilinib, jamoat tartibini saqlash, huquqbuzarliklarning oldini olish, jinoyatchilikni jilovlash bo`yicha qilinishi lozim bo`lgan ishlar qayd etildi.

Tadbir davomida odob-axloq qoidalariga amal qilish lozimligi tushuntirildi. Huquqbuzarlik va jinoyatlarning barvaqt oldini olish borasidagi tezkor, profilaktik tadbirlarni o`z vaqtida samarali tashkil etish yuzasidan mas’ullarga topshiriqlar berildi.

Yig`ilish davomida aholi osoyishtaligini ta’minlash va qonunbuzarliklarni issiq izida fosh etgan tuman ichki ishlar bo`limi hamda milliy gvardiya xizmatchilariga tashakkurnomalar topshirildi.

Arnasoy tumani ichki ishlar bo`limida ham shaxsiy tarkib hamda milliy gvardiya xizmatchilari ishtirokida yo`riqnoma o`tkazildi. Tadbirda obod va xavfsiz mahalla tamoyili asosida olib borilayotgan ishlarga diqqat qilindi. Shu ma’noda xizmat yo`nalishlarida osoyishtalikni ta’minlash, jinoyatchilikning oldini olish, qonuniylik va huquq-tartibotni ta’minlash bo`yicha topshiriqlar berildi.

Bundan tashqari fuqarolar bilan xushmuomalada bo`lish, xizmat intizomiga qat’iy rioya etish, tamagirlik va boshqa salbiy holatlarga yo`l qo`ymaslik zarurligi uqtirildi. Jarayonda jamoat tartibini saqlash va kriminogen vaziyatni barqarorlashtirish, jinoyatchilikka qarshi kurashish, huquqbuzarliklar profilaktikasini ta’minlashda jonbozlik ko`rsatib kelayotgan bir guruh soha xodimlari viloyat IIB boshlig`ining tashakkurnomasi bilan taqdirlandi.