Do`stlik tumanining “Mevazor” mahallasida ichki ishlar organlari, sudlar, prokuratura, adliya va soliq idoralari mutasaddilarining aholi va yoshlar uchun ommaviy sayyor qabuli bo`lib o`tdi.

Mazkur jarayonda Jizzax viloyati ichki ishlar boshqarmasi boshlig`i, general-mayor G`ayrat Qodirovga 13 nafar jismoniy va yuridik shaxslar murojaat qildi. Jumladan, davolanish, ishga joylashish, tadbirkorlik faoliyatini yo`lga qo`yish uchun kredit ajratilishi, kommunal xizmat ko`rsatish sifatini yaxshilash, himoya orderi olish, transport vositasini jarima maydonidan chiqarish, korxonalar o`rtasidagi shartnoma shartlarining bajarilishini ta’minlash, hujjatlarni soxtalashtirgan qonunbuzarga chora ko`rish, mulk bo`linishini adolatli hal qilish yuzasidan ko`mak so`raldi.

O`z navbatida ushbu muammolarni hal qilish bo`yicha tegishli sohaviy xizmatlar hamda boshqa idoralar mutasaddilariga topshiriqlar berildi. Tadbir doirasida 3- sektor rahbari bir ayolga subsidiya asosida tikuv mashinasi, ikki nafar fuqaroga kredit olish, 3 nafar yoshga esa oliy o`quv yurti kontarkt to`lovining to`lab berilishiga oid sertifikatlarni topshirdi.

Shuningdek, 4 kishi boshqarma boshlig`idan shaxsni tasdiqlovchi ИД kartalarni qabul qilib oldi. Ma’lumot o`rnida aytish kerak, huquqni muhofaza qiluvchi organlar mas’ullari viloyatning shahar va tumanlarida ommaviy sayyor qabullarning ikkinchi davrasini o`tkazishmoqda.