Ayni vaqtda Jizzax viloyatida faoliyat yuritayotgan respublika ishchi guruhi Jizzax shahar IIB 3- sonli ichki ishlar bo`limida hokimlik, huquqni muhofaza qiluvchi organlar mas’ullari hamda mahalla ettiliklari bilan muloqot o`tkazdi. Mazkur jarayonda viloyat markazida 2024 yil davomida sodir etilgan jinoyatlar hamda ichki ishlar organlari va mahalla ettiliklarning qonunbuzarliklarning oldini olish borasidagi faoliyati tahlil etildi.

So`ng mamlakatimiz rahbarining joriy yil 3 yanvardagi “2025 yilda respublika mahallalarida xavfsiz muhitni yaratish va huquqbuzarliklarning barvaqt oldini olish tizimi samaradorligini yanada oshirish bo`yicha chora-tadbirlar to`g`risida”gi qarori ijrosini ta’minlash masalasi ko`tarildi. Shuningdek, yig`ilganlarning huquqbuzarlik va jinoyatlarning oldini olish hamda ijtimoiy profilaktikani tashkil qilishga oid takliflari o`rganildi. 

Ishchi guruh a’zolari Jizzax shahridagi “Madaniyat” mahallasi ettiligi bilan ham uchrashdi. Bunda jinoyatchilikni jilovlash borasida qilinayotgan ishlarga diqqat qaratildi. Ma’lum qilinishicha, 2024 yilda mahallaga 109 ta kuzatuv kameralari o`rnatilishi, profilaktik ishlar hamda aholi muammolarini hal qilishga qaratilgan choralar natijasi o`laroq mahalla “qizil” toifadan “sariq”qa o`tgan. Bu yildan esa ettilik “yashil” maqomini mahkam tutishga bel bog`lagani qayd etildi.

Muloqot jarayonida davlatimiz rahbarining joriy yil 3 yanvardagi qaroriga asosan bandlikni ta’minlash, yoshlarning bo`sh vaqtini tashkil etishga qaratilgan tadbirlarni kuchaytirish masalasiga alohida e’tibor qaratildi.