Paxtakor tumanida tashkil qilingan “Sayyor patrul” guruhi tomonidan ko`cha va jamoat joylarida sodir etilishi mumkin bo`lgan qonunbuzarliklarning oldini olish choralari ko`rilmoqda. Shu maqsadda aholi gavjum joylar, savdo va ko`ngilochar markazlarda jamoat tartibini saqlash bilan birga mahallalarda targ`ibotlar ham qilinmoqda.

Ta’kidlash joiz, mazkur “Sayyor patrul” guruhi viloyat IIB JXX JTSB PPX bataloni, YHXB hamda O`zbekiston Respublikasi Milliy gvardiyasi va viloyat FVB, Paxtakor tumani IIB xodimlaridan tuzilgan. Guruh a’zolari nizoli oilalar, janjal va nizoga sabab bo`ladigan hamda nosog`lom turmush tarzini kechiruvchi fuqarolar bilan ham profilaktik suhbatlar o`tkazishmoqda.

Hududning Do`stlik, Dilorom va Suvonobod mahalla fuqarolar yig`inida bo`lgan guruh a’zolari umumiy ovqatlanish shohobchalari rahbarlari va ish boshqaruvchilari bilan muloqot qilishdi. Shu bilan birga fuqarolar ko`p bo`ladigan joylarga hushyorlikni oshirish, qonunbuzarlikka guvoh bo`lganda huquq-tartibot idoralariga xabar berishga oid targ`ibot materiallari ilindi.

Shuningdek, ko`p qavatli uylarda aholi bilan ham suhbat qilinib, yo`laklarda buyumlarni nazoratsiz qoldirmaslik, bu kabi holatlar o`g`irlik jinoyati sodir etilishi sabab bo`lishi haqida tushunchalar berildi.

“Sayyor patrul” guruhi tomonidan o`q-otar ov quroliga ega shaxslarning ov qurolini belgilangan tartibda saqlashlari ham o`rganilayotir.