Jizzax viloyati Zafarobod tumani Samarqand mahallasi “Obod xonadon”, “Obod ko’cha” va “Obod mahalla” dasturi doirasida obod qilinadi. Jizzax viloyati IIB boshlig’i, general-mayor G’ayrat Qodirov ushbu mahallada bo’lib, hududda dastur doirasida amalga oshirilishi rejalangan ishlar bilan tanishdi.

Ma’lum qilinishicha, dastur doirasida mahalla fuqarolar yig’ini uchun yangi bino hamda profilaktika inspektoriga xizmat uyi bunyod etiladi. Hududdagi 18- sonli o’rta umumta’lim maktabining isitish tizimi yangilanib, ichimlik suvi bilan ta’minlanadi. 16 kilometrdan ziyod ichki yo’llarga asfal’t hamda beton yotqazilib, 17 kilometrga yaqin piyodalar yo’laklari quriladi va 3 yarim kilometri shag’allashtiriladi. 350 ga yaqin tungi yoritish ustunlari, 100 dona temir-beton ustunlar o’rnatish, 5 kilometrdan ziyod elektr tarmog’i tortish va 2 dona transformator o’rnatish ham rejalangan.

Bundan tashqari aholini toza ichimlik suvi bilan ta’minlash, 240 ta xonadonni tabiiy gaz tarmog’iga ulash, yangi irrigatsiya tarmoqlari o’rnatish va sizot suvlari bilan bog’liq masalani hal etishga ham e’tibor qaratilgan. Obodlik doirasida 9 xonadonli 2 ta barak tipidagi uylar ta’mirlanib, 1- sonli yotoqxonada yashayotgan 5 ta xonadon uy-joy bilan ta’minlanadi. SHu bilan birga kuzatuv kameralari o’rnatish, yoshlarning bo’sh vaqtlarini mazmunli tashkil etish maqsadida markaziy o’yingoh soz holatga keltirilib, 2 ta bolalar maydonchalari bunyod etiladi. Qisqasi mazkur bunyodkorlik doirasida aholi uchun zarar sharoitlar yuzaga keltiriladi.

Sektor rahbari mahalla beshligi tomonidan “xonadonbay” ishlash orqali fuqarolarning muammolarini o’rganish hamda aniqlangan kamchiliklarni hal etish yuzasidan topshiriqlar berdi. Bundan tashqari obodonlashtirish ishlarini uyushqoqlikda tashkil etish, jarayonda aholi faol ishtirokini ta’minlash lozimligi qayd etildi.