Jizzax viloyati ichki ishlar boshqarmasi boshlig`i, general-mayor G`ayrat Qodirov Paxtakor tumanining “Bog`ishamol” MFYda sayyor qabul o`tkazdi. 3- sektor rahbari qabul avvalida tuman kambag`allikni qisqartirish va aholi bandligiga ko`maklashish bo`limi tomonidan tashkil etilgan bo`sh ish o`rinlari mehnat yarmarasi faoliyati bilan tanishdi. Ish beruvchilar bilan mavjud ish o`rinlari, fuqarolar bandligini ta’minlash borasidagi ishlarga e’tibor qaratdi.

Shuningdek, o`zini-o`zi band qilish uchun 7 nafar xotin-qizga tikuv moshinalari, yana bir paxtakorlikka elektromotosikl, 6 nafar murojaatchiga motokultivator, chorvachilik, engil konstruksiyali do`kon qurish uchun kredit ajratilganligi, 5 nafar yoshlarga turli yo`nalishlarda moddiy yordam ko`rsatilganligi haqidagi sertifikatlar topshirildi.

Tadbirda sportning milliy kurash turi bilan shug`ullanib, yuqori natijalarga erishib kelayotgan 6 nafar yoshlar hamda 5 nafar tashabbuskor o`g`il-qizlar viloyat ichki ishlar boshqarmasi boshlig`ining faxriy yorlig`i hamda esdalik sovg`alari topshirildi.

Muloqotda sektor rahbaridan tumanning “Bog`ishamol”, “Mingchinor”, “Dilorom”, “Nurlipangat” mahallalarida istiqomat qilayotgan aholi o`zlarini qiynayotgan muammolarini hal etishda yordam so`rashdi. Xususan, salomatligini tiklash, uy-joy bilan ta’minlash, aliment pullarini undirish, elektr tarmog`ining simyog`ochlarini yangilash, moddiy yordam ko`rsatish kabi masalalarga mutasaddilar ishtirokida echim izlandi. Shuningdek, tadbirkorlik faoliyatini yo`lga qo`yish uchun kredit olish, tikuvchilik faoliyatini kengaytirish uchun subsidiya ajratish, ko`p qavatli uyning tom qismini ta’mirlash, issiqlik tizimini soz holatga keltirish uchun ko`mak zarurligi bayon etildi.

Qabul davomida ko`tarilgan masalalarni o`z vaqtida hal etish hamda kuz-qish mavsumiga ijtimoiy soha ob’ektlari va aholi xonadonlarini tayyor holatga keltirish bo`yicha mas’ullarga topshiriqlar berdi.