Jizzax viloyati ichki ishlar boshqarmasi boshlig`i, general-mayor G`ayrat Qodirovning navbatdagi sayyor qabuli Jizzax shahrining Zilol mahallasida bo`lib o`tdi. Sektor rahbari qabul avvalida o`zini-o`zi band qilish uchun 5 nafar xotin-qizlarga subsidiya asosida tikuv moshinalari, bir kishiga kredit mablag`i ajratilganligi haqida hamda 10 nafar yoshlarga oliy ta’lim uchun shartnoma pulining ma’lum qismi to`langanligi va salomatligini tiklash bilan bog`liq harajat qoplab berilganligi to`g`risidagi sertifikatlar topshirildi. 4 nafar tashabbuskor yoshlar viloyat ichki ishlar boshqarmasi boshlig`ining faxriy yorlig`i hamda esdalik sovg`alari bilan taqdirlandi.

Muloqotda sektor rahbaridan shaharning “O`ratepalik”, “Olmazor”, “Zilol”, “Uchariq” hamda Sharof Rashidov tumanining “Qahramon” mahallasida istiqomat qilayotgan yurtdoshlarimiz o`zlarini qiynayotgan muammolarini hal etishda yordam so`rashdi.

Xususan, yaroqsiz holga kelgan elektr simlarini almashtirish, ko`chalarga shag`al yotqizish, elektr simyog`ochlarni yangilash, transformator o`rnatish kabi masalalarga mutasaddilar ishtirokida echim izlandi. Shuningdek, “Zilol” mahallasidagi 29- sonli o`rta umumta’lim maktabiga qo`shimcha o`quv binosi qurish, maktab hududidagi mini monomarkazining issiqlik tizimini soz holatga keltirish, ishga joylashish, ko`chalarni tungi vaqtda yoritish, asfalt qilish, avtomashinalar tezligini cheklashga oid masalalar ham ko`tarildi.

Ko`tarilgan masalalarni o`z vaqtida hal etish hamda kuz-qish mavsumiga ijtimoiy soha ob’ektlari va aholi xonadonlarini tayyor holatga keltirish bo`yicha mas’ullarga topshiriqlar berdi.

Sayyor qabulda jinoyatchilikning oldini olish, mavjud masalalarni bartaraf etishda jonbozlik ko`rsatgan Zilol mahallasining profilaktika inspektoriga fuqarolar tomonidan minnatdorlik bildirildi.