Jizzax viloyati IIB boshlig’i, general-mayor G’ayrat Qodirovning navbatdagi sayyor qabuli YAngiobod tumanining Havotog’ qishloq fuqarolar yig’inidagi Qo’riq qishlog’ida bo’lib o’tdi. Aholi tomonidan ko’tarilgan masalalarni tez va samarali hal etish maqsadida mazkur tadbirga 3- sektor ishchi guruhi, xususan hokimlik, viloyat hamda tuman tashkilotlari va muassasalari mas’ullari jalb etildi. 

Muloqot jarayonida havotog’liklar turar joyni ta’mirlash, uy qurish uchun qurilish mahsulotlari ajratish, ichimlik suvi tarmog’i tortish, davolanish xarajatlarini qoplash, nafaqa pullarini undirish, ishga joylashish, qishloq vrachlik punktini mutaxassis bilan ta’minlash borasida ko’mak so’radilar. O’z navbatida viloyat IIB boshlig’i fuqarolar tomonidan ko’tarilgan muammolarga yechim topish uchun tegishli soha vakillarini biriktirdi.  

Sayyor qabul davomida Prezidentimiz tomonidan ilgari surilgan 5 muhim tashabbus doirasida Havotog’ qishloq fuqarolar yig’inida yashovchi 5 nafar faol yosh 3- sektor rahbarining faxriy yorliq va sovg’alari bilan taqdirlandi. “Temir daftar” va “Ayollar daftari”da ro’yxatda turgan 4 nafar fuqaroga esa mikroto’lqinli pech’ hamda tikuv mashinalari topshirildi.

Yаna 4 kishi bankdan imtiyozli kredit olish imkonini beruvchi sertifikatni qabul qilib oldi. Bu mablag’ minikul’tivator, yuk tashuvchi mototransport vositasi hamda non pishirish uskunasi sotib olishga yo’naltiriladi. Xuddi shunday, fuqaroligi bo’lmagan 3 kishiga O’zbekiston Respublikasi fuqaroligini tasdiqlovchi ID kartalar topshirildi.

Sayyor qabul doirasida viloyat sog’liqni saqlash boshqarmasining endokrinolog, ortoped, pediatr, kardiolog va nevropotolog mutaxassislari mobil tibbiy avtobusda hudud aholisini ko’rikdan o’tkazishib, davolanishga oid yo’llanma va maslahatlar berdilar. 3- sektor rahbari tibbiy ko’rik jarayoni va hududdagi QVP filiali faoliyati bilan tanishdi.

Viloyat ichki ishlar boshqarmasi boshlig’i qishloqdagi Fayz ko’chasiga ham bordi. Fayzliklar sayyor qabulda elektr ta’minotini yaxshilash masalasini ko’targandilar. SHu joyda muammoni bartaraf etish choralari belgilab olindi. Aytgancha, sayyor qabul o’tkazilgan kuni 3- sektor mas’ullari tashabbusi va ko’magida qishloqning Qo’riq va Toshqo’rg’on ko’chalariga 610 metr uzunlikda shag’al yotqizildi. Bu ishga 5 ta yuk tashish hamda 1 ta yuk ortish texnikasi va 1 ta greyder jalb qilindi. 3- sektorda ezgulikka esh tadbirlar davom etmoqda.