Qadrli shifokorlar, aziz hamkasblar!

Barchangizni bugungi Tibbiyot xodimlari kuni bilan qutlar ekanman, ichki ishlar organlari xodimlari, soha faxriylari hamda ularning oila a’zolari salomatligini asrash borasidagi fidokorona mehnatingizni yuksak qadrlashimizni bildirmoqchiman. Sizlar nafaqat muolaja va dori-darmonlar, balki shirin so`zingiz bilan dardlarga malham bo`lmoqdasizlar. Shaxsiy tarkib tibbiy madaniyatini oshirish borasidagi faoliyatingiz ham e’tirofga loyiq. Qolaversa, pandemiya davrida ko`rsatgan iroda va matonatingizni unutganimiz yo`q.

Yana shunisi aniqki, Jizzax viloyati IIB tibbiyot bo`limining moddiy-texnik imkoniyatlari yildan yilga kuchaymoqda. Jumladan, bo`lim tarkibida gospital, poliklinika, sanitariya-epidemiologiya nazorati markazi hamda harbiy-tibbiy komissiya mavjud. Bugun mamlakatimizda kechayotgan o`zgarishlarga uyg`un tarzda tibbiyot bo`limi shifokorlari ixtiyoridagi zamonaviy tashxis va davolash uskunalari soni 200 tadan ortganligini ham qayd etmoqchiman.  

Shuningdek, viloyat ichki ishlar organlari xodimlari tibbiyot bo`limining jarroh, terapevt, nevropotolog, okulist, LOR, dermatovenerolog, stomatolog, pediatr, oftalmolog, funksional diagnost, ginekolog, rentgenolog, biokimyoviy laboratoriya sanitariya hamda umumiy amaliyot shifokorlari xizmatidan foydalanishlari uchun barcha sharoitlar yaratilgan. Xususan, bo`lim va gospital joylashgan bino kapital ta’mirdan chiqarildi.  

Yaqin kelajakda tibbiyot bo`limi hududida 4 qavatli bino qurish rejalashtirilgan. Yangi binoda laboratoriya majmuasi, bakteriologik laboratoriya, tashxis markazi, tibbiy asboblarni zararsizlantirish xonasi, harbiy tibbiy komissiya va ma’rifat zali bo`lishi ko`zda tutilgan.

Qadrli shifokorlar, hamshiralar va kichik tibbiyot xodimlari!

Sizlarni Tibbiyot xodimlari kuni munosabati bilan yana bir bor qutlar ekanman, barchangizga mustahkam sog`lik, uzoq va sermazmun umr, oilaviy xotirjamlik hamda ichki ishlar organlari xodimlari salomatligini asrashga qaratilgan sharafli xizmatlaringizda ulkan muvaffaqiyatlar tilab qolaman!