Jizzax viloyati ichki ishlar boshqarmasi boshlig`i aholi muammolariga echim topish, hududlarni ijtimoiy-iqtisodiy rivojlantirish maqsadida joylarda aholi va mas’ullar bilan muloqot qilmoqda. Xususan, 3- sektor rahbari Zafarobod tumani “Tinchlik” mahallasida bo`lib, aholi punktida “Obod xonadon”, “Obod ko`cha” va “Obod mahalla” dasturi doirasida amalga oshirilayotgan ishlarning borishi bilan tanishdi.

Tuman mutasaddilari bilan birga aholining tadbirkorlik tashabbuslarini qo`llab-quvvatlash, infratuzilmani yanada yaxshilash bo`yicha rejalangan va shu asosida olib borilayotgan ishlar muhokama qilindi. Ehtiyojmand oilalarga zarur yordam ko`rsatish, temir-beton ustunlar hamda transformatorlar o`rnatish, elektr tarmog`i tortish, ko`chalarni shag`allashtirish, sizot suvlari chiqib ketishi uchun ariqlar qazish, piyodalar yo`laklari qurish ishlarini jadallashtirish lozimligi qayd etildi. Shu bilan birga bolalar va sport maydonlari barpo etish bo`yicha mas’ullarga vazifalar yuklandi.

Ko`cha yuzasidagi noqonuniy qurilmalarni buzish, aholi xonadonlarida zarur turmush sharoitini yuzaga keltirish masalalariga ham e’tibor qaratildi. Manzarali va mevali daraxt ko`chatlari o`tqazish, obodlik ishlarida aholi ishtirokini oshirish bo`yicha ham ko`rsatmalar berildi.

Ta’kidlash joiz, 700 nafardan ziyod aholi istiqomat qiladigan mahalladagi obodlik ishlari Navro`z umumxalq bayrami arafasida yakunlanishi ko`zda tutilgan. Ushbu ishlar natijasida hudud infratuzilmasi yaxshilanib obod maskanga aylantiriladi.