Uchqo`rg`on tajribasi joriy qilinadi
Zafarobod
tumanini ijtimoiy-iqtisodiy rivojlantirish bo`yicha 3- sektor mas’ullari
tashabbusi bilan tomorqalardan samarali foydalanish, xususan, qulupnay
etishtirishni ilg`or uslub va texnologiyalar asosida yo`lga qo`yish bo`yicha
seminar uyushtirildi.
Mahallalar
ettiliklari, tomorqadan unumli foydalanayotgan fuqarolar, hokimlik va moliya
muassasalari vakillari ishtirokida o`tgan tadbir avvalida Namangan viloyatining
Uchqo`rg`on tumanidan taklif etilgan omilkor dehqonlar tomonidan ekinni plyonka
ostida etishtirish, tomchilatib sug`orishni yo`lga qo`yish, oraliq ekinlarni
ekish, ko`chat tayyorlash, issiqxona va ochiq maydonlardan hosil olish,
zararkunanda hasharotlarga qarshi kurashish, gidroponika usulini qo`llash
yuzasidan tavsiyalar berildi.
Shuningdek, tomorqachilikni
qo`llab-quvvatlash bo`yicha moliya muassasalari ajratayotgan kreditlar,
mahsulotni ichki bozorga chiqarish va xorijga eksport qilish hamda olinajak
daromad xususida batafsil so`z yuritildi. Seminar davomida qulupnay etishtirish
tajribasini o`zlashtirish maqsadida 12 nafar zafarobodlikni Uchqo`rg`on
tumaniga jo`natishga kelishib olindi. O`z navbatida ular mahalla ettiliklari
ko`magida mazkur ekin turi etishtirilishini hududda keng joriy qilishlari kerak
bo`ladi.
