Jizzax viloyati ichki ishlar boshqarmasida huquqbuzarliklar profilaktikasi va jinoyatchilikka qarshi kurashish bo`yicha idoralararo komissiyaning yig`ilishi o`tkazildi. Yig`ilishda kun tartibidagi masala yuzasidan viloyat ichki ishlar boshqarmasi JXX huquqbuzarliklar profilaktikasi boshqarmasi boshlig`i, podpolkovnik Mirzabek Ro`ziqulov ma’ruza qildi.

Ta’kidlanishicha, mamlakatimiz rahbarining 2017 yil 14 martdagi “Huquqbuzarliklar profilaktikasi va jinoyatchilikka qarshi kurashish tizimini yanada takomillashtirish chora-tadbirlari to`g`risida”gi qarori asosida viloyat huquqni muhofaza qiluvchi idoralar, jamoat tashkilotlari va boshqa mas’ullar tomonidan “huquqbuzarliklar oqibati bilan kurashish emas, balki, ularning barvaqt oldini olish” tamoyili asosida ish olib borildi. Fuqarolar tinchligi va osoyishtaligi, xavfsiz muhitni ta’minlashga qaratilgan ushbu hamkorlikdagi tadbirlar ijobiy natijaga erishishda muhim omil bo`ldi.

Yig`ilishda “Obod va xavfsiz mahalla” tamoyili asosida amalga oshirilgan ishlar va yil davomida sodir etilgan jinoyatlar hududlar kesimida tahlil qilinib, ayrim idora va tashkilotlar o`zlariga yuklatilgan vazifaga etarli darajada e’tibor qaratishmayotgani tanqid qilindi.

Majlis davomida viloyat hududida huquqbuzarliklar profilaktikasi va jinoyatchilikka qarshi kurashish bo`yicha yo`l qo`yilgan kamchiliklarni hal etish va kelgusida amalga oshiriladigan ustuvor vazifalar belgilab olindi.