Assalomu alaykum, aziz yurtdoshlar!

Bugungi kunda respublikamizda hurmatli Prezidentimiz rahbarligida inson qadrini yuksaltirish, fuqarolarning konstitusiyaviy huquq va erkinliklarini himoya qilish, jamiyatda tinchlik va osoyishtalikni ta’minlashga qaratilgan ko`lamli islohotlar amalga oshirilmoqda. Mazkur o`zgarishlar bosh vazifasi mahallalarda xavfsiz muhitni yaratish, qonunbuzarliklarning oldini olish va jinoyatchilikka qarshi kurashish bo`lgan ichki ishlar organlari xodimlarini fidoyilik bilan xizmat qilishga undamoqda.

Natijada soha vakillarining sa’y-harakati bilan joriy yilning o`tgan davrida viloyatdagi 309 ta mahallaning 183 tasida jinoyat sodir etilishiga yo`l qo`yilmadi, 96 tasida jinoyatlarni kamaytirishga erishildi. 

Ammo “qizil” toifadagi mahallalar soni Jizzax shahri, Sharof Rashidov, Forish va Zarbdor tumanlarida yuqoriligicha qolmoqda. Demakki, ushbu hududlarda ijtimoiy-ma’naviy muhitni sog`lomlashtirishga qaratilgan ishlar va ijtimoiy profilaktik tadbirlarini yanada kuchaytirish zarur. Bu jarayonda kiberjinoyatlarning oldini olish muhim ahamiyat kasb etmoqda.

Chunki viloyatda qayd etilgan qonunbuzarliklarning 42 foizi axborot texnologiyalari orqali, masofadan turib amalga oshirilgan. Ya’ni kimdir ishonuvchanligi, boshqalar mo`may pul topish ilinjida kiberfiribgarlar tuzog`iga tushib qolyapti. Shu ma’noda barcha yurtdoshlarimizdan shaxsiy va bank plastik kartalariga oid ma’lumotlarni hech kimga oshkor qilmaslikni, notanish va zararli ilovalardan foydalanmaslikni so`rab qolamiz

Ta’kidlash joiz, kibero`g`irlik va kiberfiribgarlik jinoyatlarining asosiy salmog`i Jizzax shahri hamda Sharof Rashidov tumani hissasiga to`g`ri kelmoqda. Xuddi shunday, Jizzax shahri, Baxmal, Sharof Rashidov va G`allaorol tumanlarida o`g`irlik, Sharof Rashidov, Mirzacho`l va Forish tumanlarida firibgarliklar ko`paygan. Ushbu jinoyatlarga mol-mulk hamda tovar-moddiy boyliklarni qarovsiz qoldirish, beparvolik kabi omillar sabab bo`lyapti.

Yana bir ma’lumot: joriy yilning 7 oyi davomida olib borilgan tezkor-qidiruv tadbirlarida 135 ta korrupsiyaviy holatlarga chek qo`yilib, qidiruvda bo`lgan 267 nafar shaxsga nisbatan jazo muqarrarligi ta’minlandi. Qolaversa, 32 kilogramm 472,9 gramm miqdorida giyohvand modda, qariyb 33 mingga yaqin psixotrop va kuchli ta’sir qiluvchi dori vositalarining noqonuniy muomalasiga chek qo`yildi.

Voyaga etmaganlar, ayollar va yoshlar tomonidan sodir etilayotgan jinoyatlar ham barchamizni sergaklikka undashi zarur. Ya’ni, har birimiz farzandlarimizning bo`sh vaqtlarini mazmunli tashkil qilish choralarini ko`rishimiz, nazoratsiz qoldirmasligimiz, ularning kimlar bilan do`st tutinayotganligiga qiziqishimiz lozim.

Aziz yurtdoshlar!

Hech kimga sir emaski, mamlakatimizda, xususan, viloyatimizda avtotransport vositalari soni yildan yilga ortmoqda. Qolaversa, Jizzaxdan xalqaro ahamiyatga ega Toshkent – Termiz M-39 yo`li ham o`tgan. Mazkur jihat yo`llarda hushyorlikni oshirishimizni taqozo etmoqda. Zero haydovchilar va piyodalarda harakatlanish madaniyati etishmasligi hamda ayrimlarning qoidalarga amal qilmasligi tufayli ko`ngilsiz hodisalar soni ortib bormoqda. Ayniqsa, bolalarning jarohat olishi va o`limi bilan bog`liq holatlar ko`paygan.

Shu ma’noda, yo`l qoidalariga amal qiling, bu borada farzandlaringizga ibrat ko`rsating. Voyaga etmaganlarning kattalar nazoratisiz yo`llarda harakatlanishining oldini oling. Ana shunda o`zimiz, farzandlarimiz va boshqalarning hayoti va sog`ligini asragan bo`lamiz.

Qadrli jizzaxliklar va mehmonlar!

Bugungi kunda viloyatimizda kriminogen vaziyatni sog`lomlashtirish, mahallalarda xavfsiz muhitni yaratish, qonunbuzarliklarning asl omillarini o`z vaqtida aniqlash va manzilli bartaraf etishga qaratilgan bir qator tadbirlar o`tkazilmoqda. Jumladan, ayni damlarda ichki ishlar organlari xodimlari “Xavfsiz va sog`lom yurt” oyligi doirasida tezkor profilaktik tadbirlar tashkil qilinyapti.

Shuningdek, jinoyatchilikning barvaqt oldini olish maqsadida mahallalar, savdo markazlari, ta’lim muassasalari kabi aholi gavjum joylarni videokuzatuv qurilmalari nazoratiga olish, “namunaviy xavfsiz yo`lak” va “xavfsiz ko`cha”lar tashkil qilish, ko`p qavatli uylarning kirish yo`laklariga tashvish tugmalari o`rnatish ishlari davom ettirilmoqda.

Bundan tashqari, bir qator idoralar va tashkilotlar bilan hamkorlikda jinoyat sodir etilishiga sabab bo`luvchi ijtimoiy, psixologik va moddiy muammolarni hal qilish, har bir fuqaroda jinoyat va korrupsiyaga qarshi murosasiz munosabatni shakllantirishga qaratilgan chora-tadbirlar belgilanmoqda. Mazkur jarayonda har bir hududning o`ziga xos xususiyatlarini inobatga olinayapti.

Aziz yurtdoshlar!

Har birimiz tinchlik bebaho ne’mat ekanligini yaxshi anglaymiz. Shu nuqtai nazardan Vatanimiz mustaqilligi va osoyishtaligini ko`z qorachig`idek asrab-avaylash, jinoyatchilikni jilovlash va korrupsiyaga qarshi kurashishda Sizning ko`magingizga tayanamiz.

Qonunlarga qat’iy rioya eting, o`zgalar huquq va sha’ni, qadr-qimmati va mol-mulki daxlsizligini hurmat qiling. Doimo ogoh va xushyor bo`ling!

E’tiboringiz uchun rahmat!