Joriy yilda Jizzax viloyatidagi 13 ta fuqarolar yig`inida “Obod mahalla”, “Obod ko`cha”, “Obod xonadon” mezonlari asosida qurilish, ta’mirlash, ko`kalamzorlashtirish, shuningdek, aholining turmush madaniyatini yuksaltirishga qaratilgan tadbirlar amalga oshiriladi. Shu ma’noda Jizzax viloyati ichki ishlar boshqarmasi boshlig`i, general-mayor G`ayrat Qodirov hamda viloyat hokimining o`rinbosari Hamid Hasanov mazkur hududlar aholisi bilan uchrashuvlar o`tkazib, fuqarolarning takliflarini o`rganmoqda.

  Jumladan, Sharof Rashidov tumanining “Yaxtanlik” mahallasida aholi vakillari bilan uyushtirilgan muloqotda hududda amalga oshirilishi ko`zda tutilayotgan bunyodkorliklar haqida ma’lumot berildi. Xususan, ta’mirlash yo`li bilan davlat tashkilotlari va muassasalari, tadbirkorlik sub’ektlari binolari hamda turar joylarni zamonaviy ko`rinishga keltirish, yangi savdo va xizmat ko`rsatish shoxobchalarini barpo etish, elektr ustunlari va transfomatorlarni yangilash, yo`llarga asfalt yotqizish, piyodalar yo`laklari qurishga oid rejalar bayon qilindi. O`z navbatida, fuqarolarning bu boradagi takliflari o`rganildi.    

  Ana shunday muloqot Paxtakor tumanining “Dilorom” mahallasida ham bo`lib o`tdi. Hududni obodonlashtirishga oid rejalar tilga olinar ekan kommunal xizmat sifatini yaxshilash masalasiga alohida e’tibor qaratildi. Aholini ish bilan ta’minlash, yangi tadbirkorlik sub’ektlarini yuzaga keltirish, o`zini o`zi band etishga qaratilgan tashabbuslar har jihatdan qo`llab-quvvatlanishi bildirildi. Xuddi shunday, bu ishga barcha o`z hissasini qo`shishi ma’lum qilindi.

Mas’ullar “Obod mahalla” dasturi izchillik bilan amalga oshirilayotgan Zafarobod tumanining “Cho`liguliston” mahallasida ham bo`lishdi. Ayni vaqtga kelib, bu erda chiqindilarni tashib chiqish hamda zovurlarni tozalash nihoyalanish arafasida. Yo`llar, piyodalar yo`laklari qurish, elektr ustunlari o`rnatish, er tekislash, devorlar barpo etish qizg`in tus olgan. Mazkur jarayon bilan tanishgan mutasaddilar ish sur’atini oshirish hamda moliyalashtirish bilan bog`liq masalalarni muhokama qildilar.

  Shu kuni viloyat hokimining o`rinbosari Hamid Hasanov hamda 3- sektor rahbari G`ayrat Qodirov G`allaorol tumanining “Qangli” mahallasida ham bo`ldi. Joriy yilda mazkur aholi punktida “Obod mahalla” dasturi asosida bunyodkorlik ishlari amalga oshiriladi. Shu ma’noda tuman rahbariyati bilan qilinajak yumushlarga oid muloqot o`tkazildi.