Zarbdor tumanining “qizil” toifada turuvchi mahalalariga huquq-tartibot idoralarining zarur kuch va vositalari jalb etilib, muammolarni hududning o`zida echish hamda kriminogen vaziyatni barqaror saqlashga alohida e’tibor berilmoqda. Jizzax viloyati prokurori, adliya katta maslahatchisi Islomjon Ergashxo`jaev hamda viloyat IIB boshlig`i, general-mayor G`ayrat Qodirovlar tomonidan bu boradagi ishlar o`rganildi. Shu bilan birga tuman IIB JXX probasiya guruhi nazoratida jazo o`tayotgan mahkumlar bilan muloqot qilindi. Tadbirda ularning oilaviy sharoiti, bandligi hamda mavjud masalalariga e’tibor qaratildi.

Tumandagi “Mustaqillik” MFY “qizil” toifadagi hudud sanaladi. O`rganish davomida mahalladagi beshlik bilan suhbat qilinib, hududda joriy yilning o`tgan davrida sodir etilgan qonunbuzarliklar tahlil qilindi. Ularning sabab va omillari aytilib, jinoyatchilikning oldini olishda huquq-tartibot xodimlari keng jamoatchilik bilan hamkorlikda ish olib borish kerakligi qayd etildi.

Oilaviy ajrimlar, ichkilikka ruju qo`yganlar, nizoli oilalar bilan ishlash, ularning muammoli masalalarini hal etish bo`yicha qilinadigan ishlar belgilandi. Xuddi shunday Adirobod mahallasida mahalla faollari va sektorlar rahbarlari ishtirokida ijtimoiy-ma’naviy muhitni sog`lomlashtirish, jamoat tartibini saqlash, jinoyatchilikka qarshi kurashish borasidagi ishlar muhokama qilindi.

Xizmatni tizimli ravishda mas’uliyat va hushyorlik bilan tashkil etishga qaratilgan mazkur tadbir chog`ida aniqlangan kamchiliklarni bartaraf etish yuzasidan mutasaddilarga tegishli topshiriqlar berilib, ijrosi nazoratga olindi. Shuningdek, jinoyatchilikni jilovlash va fuqarolar osoyishtaligini ta’minlashga qaratilgan tajribalarni ommalashtirish lozimligi tilga olindi.

Jizzax viloyati huquq-tartibot idoralari rahbarlarining o`rganishlari davom etmoqda.