Jizzax viloyati ichki ishlar boshqarmasida soha vakillarining joriy yilning o`n oyi davomida qonunbuzarliklarning oldini olish hamda jinoyatchilikka qarshi kurashishga oid faoliyati muhokama qilindi. IIB rahbariyati, mustaqil boshqarmalar, sohaviy xizmatlar hamda hududiy ichki ishlar boshqarma va bo`limlari mas’ullari ishtirokida o`tgan yig`ilishni viloyat ichki ishlar boshqarmasi boshlig`i, general-mayor G`ayrat Qodirov boshqarib bordi.

Videoaloqa tarzida kechgan tadbir avvalida umumiy jinoyatchilik tahlil qilinib, kamchiliklarga yo`l qo`yganlar tanqid ostiga olindi. Chunonchi, Zarbdor, Arnasoy, Mirzacho`l va boshqa bir necha tumanlarda ayrim turdagi jinoyatlarning oshganligi qayd etildi. Shuningdek, “Xavfsiz hudud – dolzarb 50 kun” maxsus profilaktik tadbirini samarali tashkil qilish, jamoat xavfsizligini ta’minlash, yo`l-ulov hodisalarining oldini olish, profilaktika inspektorlarining faoliyatini kuchaytirish, jinoyatlarni qisqa muddatlarda fosh etish singari masalalarga e’tibor qaratildi.

O`z navbatida, sohaviy xizmatlar va hududiy ichki ishlar boshqarma va bo`limlari mutasaddilarining hisobotlari tinglanib, ularga kriminogen vaziyatni o`nglash yuzasidan topshiriqlar berildi. Shuningdek, mamlakatimiz Prezidentining 2024 yil 23 sentyabrdagi “Kambag`alikdan farovonlik sari” dasturini amalga oshirish bo`yicha birinchi navbatdagi chora-tadbirlar to`g`risida”gi qarori yuzasidan qilingan ishlar ko`rib chiqildi.

Ma’lum qilinishicha, 3- sektordagi mahallalarda yashovchi 25 ming 306 kishi kambag`allikdan chiqarilgan. Bunga 8 milliard 302 million so`m kredit, 1 milliard 937 million so`m subsidiya ajratilishi, 3 ming 584 kishini doimiy, 4 ming 320 kishini mavsumiy ish o`rinlari bilan ta’minlash, 817 kishini kasb-hunarga o`qitish, 573 kishini tadbirkorlikka yo`naltirish kabi chora-tadbilar natijasida erishilgan.

Yig`ilishda “Yashil makon” umummilliy loyihasini hayotga tatbiq qilish masalasi ham muhokama qilindi. Ma’lumot o`rnida aytish kerak, bu yil kuzda ichki ishlar organlari xodimlari 5 ming tup mevali daraxtga ega bog`larni yuzaga keltirishni rejalashtirishyapti. Shu ma’noda sug`orish tizimlari tortish, zaruriy agrotexnik tadbirlarni bajarish yuzasidan topshiriqlar berildi. Yig`ilish yakunida ko`tarilgan barcha masalalar bo`yicha vazifalar belgilab olindi.    

Jizzax viloyati IIB axborot xizmati.