6 Fevral 2024 yil 1843

O`zbekiston Respublikasi Ichki ishlar vaziri o`rinbosari Z.Kurbanov Jizzax viloyatiga tashrif buyurdi

O`zbekiston Respublikasi Ichki ishlar vaziri o`rinbosari, polkovnik Zufar Kurbanov Jizzax viloyatida jinoyatchilikning ahvoli, bu borada belgilangan vazifalar va tizim xodimlarining mazkur yo`nalishda olib borayotgan ishlarini o`rganmoqda. Dastlab viloyat ichki ishlar boshqarmasi axborot xizmati faoliyati bilan tanishdi. Shuningdek, “102” avtomatlashtirilgan ma’lumotlar tizimi, boshqarma qoshidagi tezkor qidiruv xizmati kiberxavfsizlik bo`linmasi hamda tarixiy muzeyini ham ko`zdan kechirdi.

Qayd etish lozimki, “102” avtomatlashtirilgan ma’lumotlar tizimiga qilingan har qanday qo`ng`iroq bugungi kunda hududiy ichki ishlar bo`limlari navbatchilik qismlari tomonidan emas, balki, viloyat ichki ishlar boshqarmasidagi mazkur tizimi orqali qabul qilinadi. Zamonaviy aloqa va axborot qurilmalari bilan ta’minlangan tizimda har bir murojaat ro`yxatga olinib, tegishliligi bo`yicha hududiy ichki ishlar organlarining navbatchilik qismlariga etkaziladi. Bu o`z o`rnida tezkor tergov guruhining voqea joyiga qisqa muddatda etib borishi, jinoyatlarni issiq izidan fosh qilish yoki sodir etilishi mumkin bo`lgan qonunbuzarliklarning oldini olish imkonini beradi.

O`zbekiston Respublikasi Ichki ishlar vaziri o`rinbosari Jizzax viloyatida jinoyat va huquqbuzarliklarning oldini olish, fuqarolarning xavfsizligini ta’minlash, odamlarning munosib turmush kechirishi uchun zarur sharoitlarni yaratish, hududlarda kriminogen vaziyatni yaxshilashborasidagi o`rganishlari davom etmoqda.

Text to speech