O`zbеkiston Rеspublikasi IIV shaxsiy xavfsizlik bosh boshqarmasi mas’ullari vazirlik tizimidagi Jizzax akademik liseyining bitiruvchi bosqich o`quvchilarining ota-onalari bilan uchrashishdi. Yig`ilishda yurtimizda yosh avlodning ta’lim olishi, kasb-hunar o`rganishi uchun yaratilgan qulayliklar tilga olindi. Shuningdek, kelgusida huquq-tartibot idoralarida xizmat qilish maqsadida ta’lim olayotgan o`quvchilarning ma’naviy dunyosini boyitish, bo`sh vaqtlarini mazmunli o`tkazish lozimligi tilga olindi. Shu ma’noda tavakkalchilikka asoslangan qimor o`yinlari, ularning salbiy oqibatlari tushuntirildi. Ta’lim tizimida har qanday korrupsiyaviy xolatlardan ogoh bo`lish va o`quvchilarni faqat bilim orqali istagan kasb egasi bo`lish g`oyasi orqali tarbiyalash lozimligi aytib o`tildi.

Tadbir davomida fuqarolarning huquqlari, erkinliklari va qonuniy manfaatlarini hurmat va himoya qilish, ular bilan xushmuomalada bo`lish, jamoat tartibini saqlash va jinoyatchilikka qarshi kurashish vazifalarini vijdonan bajarishga qodir bo`lgan professional xodimlarni tayyorlashni ta’minlash, o`quvchilarda sog`lom fikrlash, turli yot g`oyalarga qarshi mafkuraviy immunitetni shakllantirish kabi doimiy e’tibordagi masalalarga ham e’tibor qaratildi.

Jarayonda o`quvchilarning ota-onalariga lisеyda tashkil etilgan tayyorlov markazidagi ta’lim sifati haqida ma’lumotlar taqdim qilindi.