Jizzax davlat pedagogika universitetida sportni rivojlantirish va sohada korrupsiyaga qarshi kurash masalalariga bag`ishlangan yig`ilish bo`lib o`tdi. Viloyatdagi sport tashkilotlari, federasiyalar, maktab va muassasalar rahbarlari, murabbiylar, terma jamoalar a’zolari hamda prokuratura, ichki ishlar organlari, DXX, adliya tizimlari mas’ullari ishtirokida tashkil etilgan tadbirda joriy yilning 5 martida uyushtirilgan Korrupsiyaga qarshi kurashish milliy kengashi yig`ilishida davlatimiz rahbari tomonidan belgilab berilgan vazifalar ijrosini ta’minlash masalalariga e’tibor qaratildi.

O`z navbatida, viloyat prokurori sport tashkilotlari va muassasalarida o`tkazilgan tekshiruvlar natijalari haqida ma’lumot berdi. Mazkur jarayonda byudjet mablag`larini talon-taroj qilish, boshqa hududda yashovchi sportchilar erishgan natijalarni o`ziniki qilib ko`rsatish orqali ustama olish holatlari aniqlagani bildirildi. Xuddi shunday, mashg`ulotlar sifati, ijtimoiy himoya, yoshlarni qo`llab-quvvatlash, seleksiya borasidagi kamchiliklar tilga olindi.

Ko`tarilgan masalalar yuzasidan viloyat ichki ishlar boshqarmasi boshlig`i va boshqa huquqni muhofaza qiluvchi organlar mas’ullari, shuningdek, murabbiy va sportchilarning fikr va mulohazalari tinglandi. Yakunda mavjud nuqsonlarni bartaraf etish, chunonchi, korrupsion holatlarga barham berishga oid yo`l xaritasini ishlab chiqish va hayotga izchillik bilan tatbiq etishga kelishib olindi.