Mamlakatimizning boshqa o`quv muassasalarida bo`lgani kabi Jizzax viloyatining Sharof Rashidov tumanidagi 12- sonli maktabda ham bugun “So`nggi qo`ng`iroq” tadbiri “Ilm eng buyuk sharaf” shiori ostida o`tkazildi. Ma’lumot o`rnida aytish kerak, ushbu o`quv dargohi Jizzax viloyati ichki ishlar boshqarmasiga biriktirilgan. Shu ma’noda boshqarma boshlig`i mazkur tadbirda hozir bo`ldi va tantana ishtirokchilariga davlatimiz rahbarining bitiruvchilarga yo`llagan tabrigini o`qib, eshittirdi.

  So`ng o`quvchilari fan olimpiadalari, sport musobaqalari hamda xorijiy tillarni o`rganish borasida yuqori natijalarga erishgan muallimlar mehnati e’tirof etilib, ularning 14 nafariga faxriy yorliqlar topshirildi. Shuningdek, pensiya yoshiga etgan 4 nafar o`qituvchiga estalik sovg`alari berildi.  O`z navbatida, bilim olish borasida tengdoshlariga o`rnak bo`lgan o`quvchi va bitiruvchilar rag`batlantirildi.

Tadbir davomida o`quvchilar tomonidan namoyish etilgan “Xayr maktabim!” badiiy kompozision dasturi yig`ilganlar ko`ngliga iliqlik baxsh etdi. Nihoyat, 2025 o`quv yili nihoyalanganligini sezdirgan, bitiruvchilarni oliy o`quv yurtlarida ilm cho`qqilarini zabt etishga, kasb-hunar egallashga undovchi qo`ng`iroq yangradi.

Kezi kelganda aytish kerak, bugungacha viloyat ichki ishlar boshqarmasi ko`magida maktabdagi yo`l harakati qoidalari sinfi ko`rgazmali qurollar, yo`l belgilari, maketlar, televizor va boshqa elektron vositalar bilan jihozlandi. Xuddi shunday, maktab hovlisida zamon talablariga mos yo`l harakati maydonchasi yuzaga keltirildi.

Ana shu tarzda chaqiriqqa qadar boshlang`ich tayyorgarlik xonasi ham harbiy xizmatga oid o`quv qurollari va ko`rgazmali vositalar bilan ta’minlandi. Saf  hamda vortkout maydoni foydalanishga topshirildi. Shuningdek, sport zali ta’mirdan chiqarilib, Ichki ishlar vazirligi tomonidan o`quvchilarga 22 turdagi 132 ta sport anjomlari topshirildi.

Qolaversa, kutubxona va o`quv zalini bunyodga keltirish maqsadida rekonstruksiya va ta’mir ishlari bajarilmoqda. Mos ravishda ushbu kutubxonaga ming dona badiiy adabiyotlar olindi. Bundan tashqari, oqova tarmog`i ishga tushirildi. Maktabning tevaragiga 196 metr uzunlikda beton devorlar o`rnatilib, mavjud devorlar ta’mirlanayotir.

Yozgi ta’til davomida binoning ichki qismi ta’mirlanadi. Xuddi shunday, xavfsizlikni ta’minlashga oid tadbirlar amalga oshiriladi. Qisqasi, otaliqqa olingan maktabda ta’lim sharoitlarini yaxshilashga qaratilgan ishlar davom etadi.