Jizzax viloyati hokimligi majlislar zalida xalq deputatlari Jizzax viloyati kengashining navbatdagi ellik birinchi sessiyasi o`tkazildi. Xalq deputatlari Jizzax viloyati kengashi raisi, viloyat hokimi Ergash Saliev olib borgan sessiya kun tartibidagi masalalar qatori viloyat ichki ishlar organlari tomonidan o`tgan 2023 yilda jamoat xavfsizligini ta’minlovchi va unda ishtirok etuvchi sub’ektlar bilan hamkorlikda amalga oshirilgan ishlar va yo`l qo`yilgan kamchiliklar to`g`risida viloyat IIB boshlig`i o`rinbosari, podpolkovnik Rahmatulla Bo`rievning hisoboti eshitildi.

Ta’kidlanishicha, “Obod va xavfsiz mahalla” tamoyili asosida mahallalarni jinoyatdan holi hududga aylantirish maqsadida huquqbuzarliklar sodir etish yoki undan jabrlanish mumkin bo`lgan shaxslarning muammolarini “mahalla beshligi” bilan hamkorlikda hal etish yo`lga qo`yildi. Olib borilgan profilaktik tadbirlar natijasida viloyatdagi 308 ta mahallaning 158 tasida yoki 51,3 foizida birorta ham jinoyat sodir etilmagan, 28,9 foizida esa kamayishiga erishildi.

Bundan tashqari viloyatdagi 14 yoshdan 30 yoshgacha bo`lgan yoshlarning ijtimoiy-iqtisodiy muammolari o`rganilib “qizil” toifaga kiritildi va 700 nafarga yaqini ichki ishlar organlari rahbarlariga biriktirildi. Ular bilan uchrashuvlarda ko`tarilgan masalalarning 98 foizi hal qilindi. Ma’ruzachi, shuningdek yoshlar, voyaga etmaganlar, xotin-qizlar jinoyatchiligi, uning oldini olish yuzasidan ko`rilgan choralar, shu qatorda kelgusida jinoyatchilikning barvaqt oldini olish va huquqbuzarlikka qarshi kurashish yuzasidan “mahalla ettiligi”  ishchi guruh imkoniyatlaridan to`g`ri va unumli foydalanish, hududlarning o`ziga xos xususiyatlari asosida mahallallarni jinoyatchilikdan holi hududga aylantirishga qaratilgan manzilli chora-tadbirlarni ma’lum qildi.

Sessiyada mamlakatimiz Prezidentining 2022 yil 4 apreldagi “Avtomobil yo`llarida inson xavfsizligini ishonchli ta’minlash va o`lim holatlarini keskin kamaytirish chora-tadbirlari to`g`risida”gi va 2022 yil 12 iyuldagi “2022—2026 yillar davomida amalga oshirilishi mo`ljallangan “Xavfsiz va ravon yo`l” umummilliy dasturini tasdiqlash to`g`risida”gi qarorlarining ijrosi yuzasidan viloyat IIB JXX YHXB boshlig`i, podpolkovnik Murodbek Sherlievning axboroti eshitildi.

Sessiya kun tartibidagi 11 ta masalani deputatlar atroflicha muhokama qilishib, tegishli qarorlar qabul qilishdi.