Jizzax temir yo`l vokzali va temir yo`l infratuzilmasi ob’ektlarida jamoat tartibini saqlash, huquqbuzarliklar profilaktikasini ta’minlash va jinoyatchilikka qarshi kurashayotgan Jizzax viloyati transportda xavfsizlikni ta’minlash boshqarmasi xodimlarining kasbiy malakasini yanada oshirishga qaratilgan tadbirlar tashkil etilmoqda. Xususan, soha xodimlarining shayligini ko`zdan kechirish maqsadida saf ko`rigi va saf mashg`uloti o`tkazildi.

Bundan tashqari shu kuni IIV maxsus operasiyalarni muvofiqlashtirish boshqarmasi Jizzax viloyati maxsus otryadi bilan hamkorlikda “Jizzax temir yo`l vokzali”da amaliy o`quv mashg`uloti o`tildi. Mashg`ulotda vokzal hududida aniqlangan shubhali predmetni zararsizlantirish va xavfsizlik choralarini ko`rish yuzasidan ko`rgazmali chiqishlar qilindi. Shuningdek, mas’ul xodimlar tomonidan shaxsiy tarkibga portlovchi moddalar va portlatish uskunalarini aniqlash, zararsizlantirish va yo`q qilishda xavfsizlik qoidalariga rioya etish tartiblari hamda portlovchi moddalar va qurilmalar to`g`risida tushunchalar berildi.

Ta’kidlash joiz, viloyat transportda xavfsizlikni ta’minlash boshqarmasi shaxsiy tarkibi o`rtasida haftaning chorshanba kunlari doimiy ravishda xizmat, jangovar va axloqiy-psixologik, seshanba va juma kunlari jismoniy tayyorgarlik mashg`ulotlari reja asosida tashkil qilib borilmoqda.