Jizzax shahridagi Kibersport majmuasida sportning qo`l janggi turi bo`yicha Ichki ishlar vaziri kubogi uchun musobaqa o`tkazildi. 3 kun davom etgan bellashuvda Ichki ishlar vazirligi tarkibiy tuzilmalari va hududiy bo`linmalari xodimlari o`zlarining mahoratlarini namoyish etishdi.

O`zbekiston Respublikasi Prezidentining 2020 yil 30 oktyabrdagi “Sog`lom turmush tarzini keng tatbiq etish va ommaviy sportni yanada rivojlantirish chora-tadbirlari to`g`risida”gi farmoni va 2022 yil 20 iyundagi “Qo`l janggi sport turini rivojlantirish chora-tadbirlari to`g`risida”gi qarori asosida tashkil etilgan sport tadbirida erkaklar 57, 62, 67, 73, 80, 88, 97 va 97 kilogrammdan yuqori vazn, qizlar esa 58 kilogrammgacha va undan yuqori vazn toifalarida imkoniyatlarini namoyish etishdi. Har bir bellashuv qizg`in kechdi va yakunda kuch, chaqqonlik va mahorat o`z so`zini aytdi.

Qiziqarli va hayajonli lahzalarga boy bo`lgan mazkur musobaqada har bir vazn toifasida g`oliblikni qo`lga kiritgan sportchilar diplom, medal va qimmatbaho sovg`alar bilan taqdirlanishdi. Shohsupadan joy egallagan sportchilarga sovg`alarni Jizzax viloyati huquqni muhofaza qiluvchi organlar rahbarlari tantanali ravishda topshirishdi.

Bellashuvda umumjamoa hisobida birinchi o`rinni Farg`ona viloyati IIB terma jamoasi egallab, Ichki ishlar vaziri kubogini qo`lga kiritgan bo`lsa, keyingi o`rinni Toshkent shahri va uchinchi o`rinni Jizzax va Navoiy viloyati terma jamoalari band etishdi. Tadbirda sportchilar orasidan “Eng yaxshi texnika ustasi” va “G`alabaga bo`lgan intilishi” nominasiyalari g`oliblari hamda hakamlar tashkilotchilar tomonidan munosib rag`batlantirildi.

Jizzax viloyati IIB axborot xizmati