Jizzax viloyati prokuraturasi va viloyat IIB huzuridagi Tergov boshqarmasi hamkorligida viloyat prokuraturasining mahkama, tuman va shahar hamda harbiy prokuratura, iqtisodiy jinoyatlarga qarshi kurashish departamentining viloyat, shahar va tumanlar bo`limlari, viloyat IIB huzuridagi tergov boshqarmasi va uning hududiy bo`limlari tergovchilari ishtirokida o`quv-seminar o`tkazildi. Seminar avvalida O`zbekiston Respublikasi Bosh prokurorining birinchi o`rinbosari Bahriddin Valiev voqea joyini ko`zdan kechirish, dalillarni mustahkamlashga qaratilgan tergov va prosessual harakatlar hamda amaliyotda yo`l qo`yilayotgan kamchiliklar xususida to`xtaldi.

O`quv davomida huquqni muhofaza qilish akademiyasi, Respublika Bosh prokuraturasi, viloyat prokuraturasi va viloyat ichki IIB mutasaddilari tomonidan ma’ruzalar tinglandi. Xususan, zamonaviy kiber tahdidlar va ularga qarshi kurashish, hodisa sodir bo`lgan joyni ko`zdan kechirishda zamonaviy texnika vositalari va raqamli kriminalistikaning hozirgi imkoniyatlari, poraxo`rlik jinoyatlari haqidagi ariza va xabarlarni ko`rib chiqish, bu toifadagi jinoyat ishlarini tergov qilish va sudda ko`rishda alohida e’tibor qaratilishi lozim bo`lgan holatlar bo`yicha ishtirokchilarning bilimlari boyitildi.

Bundan tashqari energiya resurslarining talon-taroji bilan bog`liq jinoyat ishlarini tergov qilishning o`ziga xos xususiyatlari, yo`l-transport hodisalari bo`yicha tergovga qadar tekshiruv va tergov harakatlarini o`tkazishning o`ziga xos xususiyatlari bo`yicha ham tushunchalar berildi.

Shu qatorda pora olish jinoyati bo`yicha tezkor tadbir o`tkazish va hujjatlarni rasmiylashtirish tartibi, dron orqali jinoyatlarni aniqlash va ko`zdan kechirish bo`yicha tergov harakati amaliy tarzda ko`rsatib berildi. Shu kuni ishtirokchilar viloyat IIB ekspert kriminalistika markazining imkoniyatlari ham bilan tanishtirildi. O`z navbatida ishtirokchilar o`zlarini qiziqtirgan savollariga javob olishdi.

Yakunida bir guruh tergovchilar rag`batlantirildi.

Jizzax viloyati IIB axborot xizmati