Jizzaxda “Uch avlod” maslahat kengashining IV respublika konferensiyasi bo`lib o`tdi
Jizzax
viloyatida “Yoshlar va biznesni qo`llab-quvvatlash yili” munosabati bilan ichki
ishlar organlarining “Uch avlod” maslahat kengashining ИВ respublika
konferensiyasi bo`lib o`tdi. Mamlakatimiz rahbarining 2023 yil 12 sentyabrdagi
“O`zbekiston - 2030” strategiyasi to`g`risida”gi farmonida belgilab berilgan
vazifalar ijrosini ta’minlash maqsadida uyushtirilgan ushbu anjumanda
yurtimizning barcha hududlaridagi ichki ishlar organlari faxriylar kengashlari
a’zolari hamda yosh xodimlar ishtirok etdilar.
Anjumanning birinchi kuni amaliy tadbirlar
tashkil qilindi. Chunonchi, konferensiya qatnashchilari 5 ta guruhga ajralgan
holda viloyatning barcha shahar va tumanlaridagi bir qator ta’lim muassasalari
o`quvchilari, ilm-fan, san’at, sport,
hunarmandchilik, tadbirkorlik sohalarida yuqori natijalarga erishayotganlar
hamda ichki ishlar organlariga biriktirilgan yoshlar bilan muloqot o`tkazishdi.
Bugun esa Zomin
tumanidagi “Yoshlar markazi”da anjumanning nazariy qismi bo`lib o`tdi. Tadbirda
Ichki ishlar vazirining o`rinbosari, general-mayor Davron Nazarmuxamedov, Ichki
ishlar vazirining maslahatchisi, iste’fodagi general-polkovnik Zokirjon
Almatov, Jizzax viloyati ichki ishlar boshqarmasi boshlig`i, general-mayor
G`ayrat Qodirov va boshqalar so`zga chiqdilar.
Muloqot
chog`ida ichki ishlar organlariga biriktirilgan yoshlar bilan ishlash, ichki
ishlar organlarining yosh xodimlari bilan tarbiyaviy ishlarni amalga oshirish,
mazkur yo`nalishlarda ilg`or uslub va tajribalarni qo`llash masalalari
e’tiborda bo`ldi.
Anjuman
yakunida faxriylar kengashlari tomonidan joylarda amalga oshirilishi lozim
bo`lgan bir qator vazifalar belgilab olindi.
Jizzax viloyati
ichki ishlar boshqarmasi Axborot xizmati.
