12 Fevral 2024 yil 1485

Zomin tumanida jinoyatchilikning oldini olish maqsadida “Xavfsiz hudud” profilaktik tadbiri o`tkazildi

Zomin tumanida jamoat xavfsizligini ta’minlash, jinoyat hamda huquqbuzarliklarning barvaqt oldini olish, kriminogen vaziyatni barqarorlashtirish, jamoat tartibini saqlash maqsadida “Xavfsiz hudud” profilaktik tadbiri o`tkazildi. Mazkur tadbirga jalb etilgan sohaviy xizmatlari xodimlari uchun yo`riqnoma o`tildi. Aholi osoyishtaligini saqlash, kriminogen vaziyat barqarorligini ta’minlashga qaratilgan aniq vazifalar belgilandi.

Tadbirda soha xodimlari tomonidan ko`p qavatli uylar, korxona va tashkilotlar ko`zdan kechirildi. Jarayonda 60 nafarga yaqin shaxslar mayda bezorilik, jamoat joyida spirtli ichimlik iste’mol qilish hamda pasport tizimi qoidalarini buzganligi uchun tegishli tartibda ma’muriy bayonnoma rasmiylashtirildi. Bemaqsad yurgan fuqarolar bilan profilaktik suhbat o`tkazildi.

Hamid Olimjon mahallasida istiqomat qiluvchi 1973 yilda tug`ilgan fuqaro yonidan 3,56 gramm og`irlikda marixuana topildi. Bundan tashqari profilaktika inspektori tomonidan turli xil ma’muriy huquqbuzarliklarga qonuniy qaror qabul qilish uchun yuborilgan 14 ta ma’muriy ish hujjatlari jinoyat ishlari bo`yicha Zomin tuman sudi tomonidan ko`rib chiqildi.

Shuningdek, viloyat ichki ishlar boshqarmasi jamoat xavfsizligi xizmati YHXB xodimlari tomonidan 248 ta avtotransport vositalari ko`zdan kechirildi. O`rganish davomida 110 nafar haydovchi yo`l harakati qoidalarini buzganligi aniqlandi. 27 ta transport vositalari jarima maydoniga joylashtirildi.

 “Xavfsiz hudud” profilaktik tadbiri doirasida chet davlatlariga borib qaytgan fuqarolar, probasiya va ma’muriy nazorat ostida turuvchi shaxslar bilan suhbat o`tkazildi. Ko`p qavatli uylar va savdo komplekslarida fuqarolarga o`zlariga tegishli mol-mulklarni qarovsiz qoldirmaslik yuzasidan tushuntirish ishlari olib borildi.

Zomin tumani hududida ijtimoiy vaziyat barqarorligini ta’minlash, jinoyatchilik va huquqbuzarliklarni barvaqt oldini olishga qaratilgan keng qamrovli tezkor-profilaktik ishlar davom etmoqda.

Text to speech