Ижтимоий тармоқларда Наманган вилояти Чуст тумани Олмос қишлоғида истиқомат қилувчи, 1985 йилда туғилган Гулмира Илёсованинг Жиззах вилояти Фориш тумани ИИБ ходимлари акасига жисмоний куч ишлатганлиги тўғрисидаги мурожаати тарқалди.

Дарҳақиқат, Гулмира Илёсованинг акаси Чуст туманининг Олмос қишлоғида яшовчи, Жиззах вилоятининг Фориш туманига мавсумий деҳқончилик қилиш учун келган, 1978 йилда туғилган Мирзаолим Илёсов жорий йилнинг 5 июль куни Фориш тумани ички ишлар бўлимига олиб келинган. Бунга Мирзаолим Илёсовнинг шаърий никоҳдаги турмуш ўртоғи, 1990 йилда туғилган Ш.И.нинг Фориш тумани ИИБ номига ёзган аризаси сабаб бўлган.

Аризада билдирилишича, Мирзаолим Илёсов ва Ш.И. 2017 йилдан буён бирга ҳаёт кечиришади. Аёлнинг биринчи турмушидан туғилган, 2012 йилда туғилган ўғли ҳамда отаси Мирзаолим Илёсов бўлган, 2018 йилда туғилган ўғлига мунтазам равишда тазйиқ ўтказган. Уларни турли усулларда қийнаган, жумладан, бошига қайноқ сув қуйган, болаларни ўлдиришини таъкидлаб келган.

Худди шундай, Ш.И. 2020 йилнинг 5 июль куни шаърий турмуш ўртоғи Мирзаолим Илёсов 2018 йилда туғилган фарзандини ҳашаротларга қарши ишлатиладиган “Нурель” кимёвий воситаси билан заҳарлаганлигини маълум қилган. Айни вақтда кимёвий восита билан заҳарланган бола Фориш тумани тиббиёт бирлашмасининг жонлантириш бўлимида.

Жорий йилнинг 5 июль куни Ш.И.нинг мурожаати асосида ички ишлар органлари ходимлари Мирзаолим Илёсовни мастлиги туфайли тиббий кўрикдан ўтказиб, Фориш тумани ИИБга келтиришади. Лекин Мирзаолим Илёсов ўзини билмайдиган даражада маст бўлгани туфайли сўроқ қилинмайди. 6 июль куни Мирзаолим Илёсов ўзига келгач, сўроқ қилинади. Мазкур жараёнда Мирзаолим Илёсов ўзини ёмон ҳис қилаётганини билдиради. Шу сабабли Фориш тумани тиббиёт бирлашмасида қайта тиббий кўрикдан ўтказилиб, қўйиб юборилади. Тиббий кўрик Мирзаолим Илёсовнинг танасида тан жароҳатлари йўқлигини, амалий соғлом эканлигини тасдиқлайди.  

Мазкур ҳолат бўйича тўпланган ҳужжатлар 2020 йилнинг 7 июль куни Фориш тумани прокуратурасига юборилган. Ҳозирги кунда Ш.И.нинг мурожаати асосида прокуратура томонидан терговга қадар текширув ҳаракатлари олиб борилмоқда.

Маълумот ўрнида айтиш керак, муқаддам Мирзаолим Илёсов 4 марта оила қурган. Биринчи турмуш ўртоғи номаълум сабабларга кўра ўзига ўт қўйиб, ўз жонига қасд қилиб, вафот этган. Икки нафар турмуш ўртоғи билан ажрашиб кетган. Худди шундай, маст ҳолатда турмуш ўртоғи Ш.И. билан тез-тез жанжаллашиб турган.