Кун қаҳрамони: подполковник Шерзод Абдуназаров

Подполковник Шерзод Абдуназаров 1979 йилда Жиззах шаҳрида туғилган. 2001 йилда Жиззах политехника институтини тамомлаган. Ички ишлар органларидаги хизматини 2006 йилда Жиззах вилояти ИИБ экспертиза криминалистика бўлимига бевосита бўйсунувчи 1- сонли экспертиза криминалистика гуруҳи инспектори лавозимида бошлади. 2007-2010 йилларда Жиззах вилояти ИИБ экспертиза криминалистика бўлимига бевосита бўйсунувчи махсус тадқиқотлар ва криминалистик қуролларни қўллаш, татбиқ қилиш гуруҳи эксперти лавозимида фаолият юритди.

2013 йилдан бошлаб Жиззах вилояти ИИБ йўл ҳаракати хавфсизлиги бошқармасида хизмат қилмоқда. У бошқармада шахсий таркиб билан ишлаш ва жамоатчилик билан алоқа боғлаш бўлинмаси инспектори, бўлинма бошлиғи, Жиззах вилояти ИИБ ЙҲХБ бошлиғининг шахсий таркиб билан ишлаш бўйича ўринбосари, Жиззах вилояти ИИБ ЙҲХБ бошлиғининг кадрлар бўйича ўринбосари бўлиб ишлади. Айни пайтда Жиззах вилояти ИИБ ЙҲХБ бошлиғининг ўринбосаридир.

Шерзод Абдуназаров талабчан, масъулиятли ва ташкилотчи раҳбар сифатида шахсий таркиб ҳурматини қозонган. Жорий йилнинг ўтган даврида у томонидан 4 килограмм 393 грамм марихауна гиёҳвандлик моддасини сақлашга оид жиноят ҳамда 850 килограмм аммиакли селитра минерал ўғитини ташиш билан боғлиқ қонунбузарлик фош этилган.

Подполковник Шерзод Абдуназаров Зарбдор, Зомин, Янгиобод туманларига бириктирилган бўлиб, бу ҳудудда унинг ташаббуси билан автомобиллар йўлларини таъмирлаш ҳамда йўл белгилари ўрнатиш ишлари уюшқоқлик билан амалга оширилмоқда. Шунингдек, Шерзод Абдуназаров бошчилигидаги ЙҲХБ ходимларидан иборат гуруҳ Сирдарё вилоятининг Сардоба туманида рўй берган сув тошқини пайтида аҳолини ҳудуддан кўчириш, сув босиш оқибатларини бартараф этиш, аҳоли пунктларида қурилиш-таъмирлаш ишлари бажарилаётган даврда йўл ҳаракати хавфсизлигини таъминлашда фаол қатнашди.

У “Сардоба” сув омборининг бузилган қисмини тиклаш учун Жиззах вилоятининг Фориш туманидаги Балиқлитоғ конидан қум ва тош ташиётган юк автомашиналарининг хавфсиз ва узлуксиз ҳаракатини таъминлашда ҳам бош-қош бўлди. Худди шундай, подполковник Шерзод Абдуназаров Жиззах вилоятида коронавирус инфекцияси тарқалишининг олдини олиш мақсадида юзага келтирилган тўсиқ постларида хизматни ташкил этишда ҳамкасбларига ўрнак бўлди. 

Шунингдек, йўл-улов ҳодисаларининг олдини олишга қаратилган амалий ҳамда тарғибот тадбирларини уюштиришда юқори самарадорликка эришаётир. Шерзод Абдуназаров Жиззах вилояти ИИБ ЙҲХБ шахсий таркибининг энг намунали раҳбар ходимларидан биридир.    

Жиззах вилояти ИИБ ахборот хизмати