Коррупция – жамиятни турли йўллар билан исканжага оладиган жирканч иллатдир. У демократия ва ҳуқуқ устуворлиги асосларига путур етказади, инсон ҳуқуқлари бузилишига олиб келади. Хуллас, коррупция бор жойда ривожланиш бўлмайди.

Навбатдаги маънавий-маърифий тадбирда шу ҳақда сўз борди. Хусусан, Жиззах давлат педагогика институти катта ўқитувчиси Акбар Валиев “Коррупцияга қарши курашишда ички назорат тузилмаларининг аҳамияти” мавзусида маъруза қилди ва Президентимизнинг 2020 йил 29 июндаги “Ўзбекистон Республикасида коррупцияга қарши курашиш тизимини такомиллаштириш бўйича қўшимча чора-тадбирлар тўғрисида”ги фармонига асосан 2020–2021 йилларда барча давлат ва хўжалик бошқаруви органларида коррупцияга қарши ички назорат тизимини босқичма-босқич жорий этиш белгиланганини айтиб ўтди.

Нотиқ коррупцияга қарши комплекс- назорат – давлат ва хўжалик бошқаруви органлари, хўжалик юритувчи субъектлар фаолиятини коррупцияга қарши курашиш соҳасидаги халқаро стандартлар, қонун ва бошқа меъёрий ҳуқуқий ҳужжатларга мувофиқ ташкил этувчи, коррупция хавф-хатарлари, манфаатлар тўқнашувини ўз вақтида аниқлаш ва чек қўйиш, қонун бузилиши ва коррупцияга оид ҳуқуқбузарликлар ҳақида хабар беришни ўзида мужассам этган профилактик тизим эканлигини таъкидлади. Шунингдек, ушбу иллатнинг олдини олишда хорижий давлатлар тажрибаси, қўллаётган усуллари, мамлакатимизда ҳам коррупцияга қарши курашиш ҳамда мазкур турдаги жиноятларнинг олдини олиш мақсадида ички назорат тизимини йўлга қўйиш ишлари, ушбу тузилма фаолияти, ҳуқуқ ва мажбуриятлари ҳақида маълумот берилди.

Йиғилишда бундан ташқари, ОИТС касаллигининг профилактикаси ҳамда жаҳон адабиёти намоёндалари Фёдор Достоевский ҳамда Тургенов Иван Сергеевичларнинг ҳаёти ва ижоди ҳақида ҳам маърузалар қилинди.